ԵԱՀԿ ԺՀՄԻԳ-ը դիտորդական առաքելություն չի ուղարկի Վրաստան հոկտեմբերի 4-ին կայանալիք ՏԻՄ ընտրությունները դիտարկելու համար։ Այս մասին հայտարարել է ԵԱՀԿ ԺՀՄԻԳ տնօրեն Մարիա Թելալյանը։
«Ցավոք, Վրաստանի իշխանությունների կողմից մեզ այդքան ուշ փուլում հրավիրելու որոշումը խոչընդոտում է իմաստալից դիտարկմանը, և ԺՀՄԻԳ-ը չի կարողանա ընտրությունների դիտորդական առաքելություն տեղակայել։ Այնուամենայնիվ, մենք հույս ունենք շարունակել մեր երկարատև համագործակցությունը Վրաստանի հաստատությունների և քաղաքացիական հասարակության հետ՝ ժողովրդավարությունն ու մարդու իրավունքները ամրապնդելու համար»,-հայտարարել է Թելալյանը։
ԵԱՀԿ ԺՀՄԻԳ-ից նշել են, որ Վրաստանի իշխանությունների հետ շփումներում ԺՀՄԻԳ-ը մշտապես ընդգծել է ժամանակին հրավերի կարևորությունը՝ հավաստի և համապարփակ ընտրությունների դիտարկում ապահովելու համար։ Նախկինում ԺՀՄԻԳ-ը ժամանակին հրավերներ է ստացել Վրաստանից՝ դիտարկելու 2006, 2010, 2014, 2017 և 2021թթ․ տեղական ինքնակառավարման մարմինների ընտրությունները, ինչը հնարավորություն է տվել արդյունավետ նախապատրաստվել ԺՀՄԻԳ-ի մեթոդաբանությանը համապատասխան։
«Որպես ԵԱՀԿ մասնակից պետություն՝ Վրաստանը պարտավորվել է անցկացնել ժողովրդավարական ընտրություններ՝ միջազգային չափանիշներին համապատասխան։ Չնայած ԺՀՄԻԳ-ը չի մեկնաբանում այն ընտրությունները, որոնք չի դիտարկում, գրասենյակը կշարունակի վերահսկել Վրաստանում տեղի ունեցող իրադարձությունները իր մանդատի շրջանակներում ընդգրկված բոլոր ոլորտներում, ներառյալ ժողովրդավարական կառավարումը, հիմնարար ազատությունները և օրենքի գերակայությունը»,- ասված է հաղորդագրության մեջ։
Նշենք, որ սեպտեմբերի 6-ին Վրաստանի վարչապետ Իրակլի Կոբախիձեն հայտարարել էր, թե Վրաստանի իշխանությունը որոշել է ԵԱՀԿ/ԺՀՄԻԳ դիտորդական առաքելությանը հրավիրել տեղական ինքնակառավարման մարմինների ընտրություններին, համապատասխան նամակն արդեն ուղարկված է։
Հետևեք մեզ տելեգրամում
