Թուրքիայի փոխնախագահ Ջևդեթ Յըլմազը Բիշքեկում մասնակցել է «Թյուրքական պետությունների կազմակերպության» (ԹՊԿ) անդամ պետությունների կառավարությունների ղեկավարների և փոխնախագահների հանդիպմանը։ Այդ մասին հայտնում է «Ermenihaber.am»-ը։
Յըլմազի խոսքով՝ Թուրքիան թյուրքալեզու պետությունների աշխարհագրությունը դիտարկում է որպես ռազմավարական տարածաշրջան և այն կենսականորեն կարևոր է համարում կայունության պահպանման, էներգետիկ կապերի ամրապնդման և կայուն զարգացման համար։
Թուրք բարձրաստիճան պաշտոնյան խոսել է նաև այսպես կոչված «Զանգեզուրի միջանցքի» բացման վերաբերյալ:
««Զանգեզուրի միջանցք»-ի բացմամբ Հարավային Կովկասում ի հայտ եկող նոր լոգիստիկ ցանցերը ոչ միայն թյուրքական աշխարհը կդարձնեն տարածաշրջանային առևտրի կենտրոն, այլև կբարձրացնեն նրա ռազմավարական դերը էներգետիկ անվտանգության տեսանկյունից»,-ասել է Յըլմազը։
Բացի այդ վերջինս խոսել է Կասպից ծովով անցնող Արևելք-Արևմուտք Միջին միջանցքի մասին՝ ասելով, որ այն ռազմավարական նախագիծ է, որը հզորացնում է մատակարարման շղթաները, դիվերսիֆիկանցում առևտուրը, բարձրացնում բարեկեցությունն ու զբաղվածության հնարավորությունները, ինչպես նաև ավելի է ամրապնդում իրենց երկրների եղբայրական կապերը։
«Թուրքիան այս երթուղու վրա է և նպաստում է դրան իր ընդարձակ ենթակառուցվածքային ցանցով, մասնավորապես՝ Բաքու-Թբիլիսի-Կարս երկաթուղով»,-ընդգծել է Յըլմազը՝ նշելով, որ շարունակելու են աշխատել իրենց բոլոր գործընկերների հետ, որպեսզի այդ միջանցքն ավելի արդյունավետ դարձնեն՝ հնարավորություն տալով, որ համաշխարհային առևտուրն ավելի արդյունավետ և արագ զարգանա։
Հետևեք մեզ տելեգրամում
