Թբիլիսիում անցկացվող «Մետաքսի ճանապարհ» համաժողովի շրջանակներում Վրաստանի վարչապետ Իրակլի Կոբախիձեն հանդիպել է Ադրբեջանի վարչապետ Ալի Ասադովին։ Հանդիպման ընթացքում քննարկվել են Վրաստանի և Ադրբեջանի միջև առկա ռազմավարական գործընկերությունը և երկկողմ կապերի հետագա զարգացումը։
Կողմերը մտքեր են փոխանակել առևտրատնտեսական համագործակցության, ինչպես նաև Ադրբեջանից ուղղակի ներդրումների իրականացման հնարավորությունների շուրջ։ Քննարկվել է նաև երկու երկրների համատեղ տարածաշրջանային նախագծերի կարևորությունը։ Նշվել է, որ արդեն գոյություն ունեցող նախագծերը Վրաստանի և Ադրբեջանի միջև վստահելի ռազմավարական գործընկերության լավագույն օրինակն են։
Հատուկ ուշադրություն է դարձվել Միջին միջանցքի և տարածաշրջանային կապերի զարգացման նշանակությանը, ինչպես նաև Վրաստանի դերին այս գործընթացում։ Իրակլի Կոբախիձեն իր ադրբեջանցի գործընկերոջը վստահեցրել է, որ Վրաստանը պատրաստ է շարունակել իր ջանքերը խաղաղության և կայունության ապահովման ուղղությամբ տարածաշրջանում։
Հետևեք մեզ տելեգրամում
