Նոյեմբերի 12-ին և 13-ին Թեհրանի սիմֆոնիկ նվագախումբը առաջին անգամ ղեկավարելու է կին դիրիժոր:
Նվագախմբի մշտական դիրիժորը Նասիմ Հեյդարիանն է, սակայն նվագախումբը պարբերաբար ունենում է հյուր դիրիժորներ: Այս անգամ այն ղեկավարելու է Փանիզ Ֆարյուսեֆին՝ դառնալով Թեհրանի սիմֆոնիկ նվագախմբի առաջին կին դիրիժորը:
Հատկանշական է, որ Ֆարյուսեֆին երաժշտական կրթություն է ստացել նաև Երևանի Կոմիտասի անվան պետական կոնսերվատորիայում: Իրանական լրատվամիջոցներից մեկին տված հարցազրույցում, պատասխանելով այն հարցին, թե իր կարիերայի ընթացքում ովքեր են իր համար օրինակ ծառայել և ոգեշնչել, Ֆարյուսեֆին նշել է. «Հայաստանում ուսանելու տարիներին իմ ուսուցիչը՝ պարոն Արամ Ղարաբեկյանը մեծ ազդեցություն է ունեցել ինձ վրա»:
Հայաստանի արվեստի վաստակավոր գործիչ Արամ Ղարաբեկյանը եղել է Հայաստանի պետական կամերային նվագախմբի ղեկավարն ու դիրիժորը։ Նա մահացել է 2014 թվականին՝ 58 տարեկանում:
Հետևեք մեզ տելեգրամում
