Մարդու իրավունքների եվրոպական դատարանը՝ ՄԻԵԴ–ը երկարաձգել է Ադրբեջանում պահվող անձանց վերաբերյալ տեղեկություններ ներկայացնելու համար սահմանված ժամկետը։ Այդ մասին հայտնել են Միջազգային իրավական հարցերով ներկայացուցչի գրասենյակից: ՄԻԵԴ-ն պահանջել էր Ադրբեջանից մինչև նոյեմբերի 4-ը տրամադրել 23 հայ գերիների վերաբերյալ ամբողջական տեղեկատվություն, ներառյալ նրանց առողջական վիճակը, սակայն այդ տվյալները սահմանված ժամկետում չեն ներկայացվել։
«Եվրոպական դատարանը նոյեմբերի 7-ին երկարաձգել է սահմանված ժամկետը։ Ըստ այդմ` Ադրբեջանի կողմից համապատասխան տեղեկությունները Եվրոպական դատարան կներկայացվեն մինչև սույն թվականի նոյեմբերի 18-ը։ Հաշվի առնելով վերագրյալը՝ այս պահի դրությամբ ՀՀ կառավարությանը հասանելի չէ հայցվող տեղեկությունը»,- հայտնել են գրասենյակից։
Միաժամանակ, գրասենյակից նշել են, որ Եվրոպական դատարանի տրամադրած տեղեկատվությունը Հայաստանի կառավարությանը որոշ դեպքերում կարող է չհրապարակվել՝ հաշվի առնելով այնտեղ առկա տվյալների գաղտնիության հնարավոր անհրաժեշտությունը։ Ադրբեջանում պահվող հայ ռազմագերիները շուրջ չորս ամիս մեկուսացված են միջազգային հանրությունից, նրանց չի տեսակցել որևէ անկախ դիտորդական կառույց։ Այդ ժամանակահատվածում բացակայում է ցանկացած պաշտոնական կամ միջազգային տեղեկատվություն՝ կապված նրանց պահման, ֆիզիկական և հոգեբանական վիճակի հետ։
Ադրբեջանը պաշտոնապես հաստատել է 23 հայերի գերեվարման փաստը։ Նրանցից 17-ը գերեվարվել են սեպտեմբերին Արցախի դեմ Ադրբեջանի ռազմական գործողություններից հետո։ Գերեվարվածների թվում են Արցախի նախկին ռազմաքաղաքական ղեկավարության բարձրաստիճան ներկայացուցիչներ՝ Ռուբեն Վարդանյան, Լևոն Մնացականյան, Դավիթ Մանուկյան, Դավիթ Բաբայան, Դավիթ Իշխանյան, Արկադի Ղուկասյան, Բակո Սահակյան և Արայիկ Հարությունյանը։
Հետևեք մեզ տելեգրամում
