Վրաստանի խորհրդարանի խոսնակ Շալվա Պապուաշվիլին հայտարարել է, որ ԵՄ արտաքին քաղաքականության բարձր ներկայացուցիչ Կայա Կալլասի հայտարարությունը ցույց է տալիս ԵՄ արտաքին քաղաքականության անհասունությունը և ներկայացնում է Վրաստանի ինքնիշխանությունը խոսքերով վերացնելու փորձ։
«Մեր ինքնիշխանությունը կարող են վերացել և՛ դաշույններով, և՛ խոսքերով. սա պետականության համար սկզբունքային նշանակություն չունի: Այն, ինչ երեկ ասաց ԵՄ արտաքին գործերի գերագույն ներկայացուցիչ Կայա Կալասը, մեր ինքնիշխանության վերացումն է խոսքերով», – հայտարարել է Պապուաշվիլին:
Նրա կարծիքով՝ Կալասը վրաց ժողովրդին դիտարկում է որպես իր կողմից ֆինանսավորվող գործակալ, և երևակայական ժողովրդի անունից փորձում է խաթարել Վրաստանի պետականությունը: Պապուաշվիլին ընդգծել է, որ Վրաստանի կառավարությունը օրինականորեն ընտրվել է ժողովրդի կողմից, և միայն ժողովուրդն ունի իր կառավարությունն ընտրելու իրավունք:
«Ի՞նչ է նշանակում ասել՝ «ես աջակցում եմ ժողովրդին, բայց ոչ կառավարությանը»: Ու՞մ կառավարությունն է սա: Սա վրաց ժողովրդի կողմից ընտրված կառավարությունն է, սա ժողովրդավարություն է: Սա ասողը կամ չի հասկանում ժողովրդավարությունը, կամ կողմնակից է այլ երկրների ինքնիշխանությունը վերացնելու քաղաքականությանը», – ընդգծել է Պապուաշվիլիի՝ նշելով, որ սա առաջին դեպքը չէ, երբ Կայա Կալասը հնչեցնում է իրականությունից կտրված գաղափարներ:
Հիշեցնենք, որ Բրյուսելում Եվրոպական խորհրդի գագաթնաժողովից առաջ Կալասը հայտարարել էր, որ ԵՄ-ն աջակցում է վրաց ժողովրդին, բայց ոչ երկրի ներկայիս կառավարությանը: Նրա խոսքով՝ իշխանությունների գործողությունները Վրաստանին տանում են սխալ ուղղությամբ և չեն մոտեցնում ԵՄ անդամակցությանը: Կալասը ընդգծել է, որ քանի դեռ երկրի ղեկավարությունը շարունակում է սխալ քայլեր ձեռնարկել, թեկնածու երկրի կարգավիճակի գործընթացում առաջընթացն անհնար է:
Հետևեք մեզ տելեգրամում
