Թուրքիայում «Ժողովուրդների դեմոկրատական կուսակցության» (ԺԴԿ-HDP) նախկին պատգամավոր Ալթան Թանը՝ հայտարարել է, որ քադայիֆ աղանդերը պատմականորեն պատկանել է դիարբեքիրցի հայերին։
Թուրքական լրատվական կայքերի փոխանցմամբ՝ վերջին շրջանում քննարկում է սկսվել քադայիֆի պատկանելիության շուրջ, ինչին միացել է նաև Ալթան Թանը։ Վերջինս նշել է. «Քադայիֆը դիարբեքիրցի հայերինն է։ Այս աղանդերի պատրաստմամբ հիմնականում զբաղվել են Դիարբեքիրի հին տեղաբնակ հայերը»։
Ալթան Թանը հիշեցրել է նաև 1869 թվականի Օսմանյան կայսրության պաշտոնական մարդահամարի տվյալները՝ ընդգծելով քաղաքի բազմազգ կազմը։ «1869 թվականի մարդահամարի համաձայն՝ Սուրի ներսի կենտրոնական հատվածում բնակվում էր շուրջ 22 հազար մարդ, որոնց 53 տոկոսը ոչ մահմեդականներ էին։ Այդ բնակչության մոտ 50 տոկոսը կազմել են հայերն ու ասորիները»,- ասել է նա։
Նշենք, որ որ Թուրքիայի փոխնախագահ Ջևդեթ Յըլմազը ավելի վաղ հայտարարել էր, թեև քադայիֆը գրանցված է որպես Դիարբեքիրի ավանդական քաղցրավենիք, այն պատրաստող վարպետների «100 տոկոսը բինգյոլցիներ են», ինչն էլ դարձել է ներկայիս բանավեճի պատճառը։
Հետևեք մեզ տելեգրամում
