Աֆղանստանի քաղաքացիների 2 խումբ փորձել է Իրանից Արաքս գետով անցնել Հայաստան։ Այդ մասին հայտնել են Քննչական կոմիտեից:
«Աֆղանստանի Իսլամական Էմիրության 2 խումբ քաղաքացիների կողմից 2026-ի փետրվարի 20-ին Իրանի տարածքից Արաքս գետով հայ-իրանական պետական սահմանը հատելու և ապօրինի ՀՀ տարածք մուտք գործելու դեպքերի առթիվ 2026 թվականի փետրվարի 21-ին ՀՀ ՔԿ Սյունիքի մարզային քննչական վարչությունում ՀՀ քրեական օրենսգրքի 469-րդ հոդվածի 3-րդ մասի 2-րդ կետի հատկանիշներով (Պետական սահմանն ապօրինի հատելը մի խումբ անձանց կողմից նախնական համաձայնությամբ) նախաձեռնվել է երկու քրեական վարույթ:
Նախաքննությունը շարունակվում է ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչությունում»,- հայտնել են ՔԿ-ից:
Փետրվարի 28-ի առավոտյան Իսրայելն ու Միացյալ Նահանգները սկսել են հարվածներ հասցնել Թեհրանին և Իրանի այլ հատվածներին։ Հարվածների հենց առաջին օրը սպանվեցին հոգևոր առաջնորդ այաթոլա Ալի Խամենեին, նաև՝ բարձրաստիճան այլ պաշտոնյաներ։ Ի պատասխան՝ Իրանը հարվածներ է հասցնում Իսրայելի տարածքին և Մերձավոր Արևելքում գտնվող ԱՄՆ ռազմական բազաներին։ Իսրայելում հայտարարվել է արտակարգ դրություն։
Հետևեք մեզ տելեգրամում
