Լեհաստանի արտաքին գործերի նախարարությունը հայտարարել է լեհական հանրային հեռուստաընկերության (TVP) հենքի վրա հայալեզու VT Hayastan News լրատվական նախագծի մեկնարկի մասին։ Ինչպես հայտնում է News.am-ը, նախաձեռնության հիմնական նպատակն է պայքարել ապատեղեկատվության դեմ և ամրապնդել տեղեկատվական դիմակայունությունը Հայաստանում ու Սփյուռքում։
Նորաստեղծ լրատվամիջոցը քաղաքական, սոցիալական և տնտեսական անցուդարձը կլուսաբանի եվրոպական տեսանկյունից՝ նպաստելով Հայաստան-ԵՄ համագործակցությանն ու հայ-լեհական կապերի սերտացմանը։ Նախագծի առաջնահերթություններից է տեղեկատվական մանիպուլյացիաների կանխումն ու այն կեղծ թեզերի չեզոքացումը, որոնք թիրախավորում են Հայաստանին և նրա միջազգային գործընկերներին։
VT Hayastan News-ը գործում է TVP-ի Միջազգային մեդիակենտրոնի կազմում և ֆինանսավորվում է Լեհաստանի ԱԳՆ-ի պետական միջոցներով։ Սա «Արևելյան գործընկերության» երկրներին ուղղված բազմալեզու նախաձեռնությունների ընդլայնման հերթական քայլն է։
Նախագծի ստեղծագործական թիմում ներգրավված են հայ լրագրողներ Ռազմիկ Մարտիրոսյանը, Հարություն Ոսկանյանը և Նունե Գևորգյանը։ Հաղորդումները հեռարձակվելու են աշխատանքային օրերին՝ Belsat հեռուստաալիքի եթերում, ինչպես նաև հասանելի կլինեն YouTube և Facebook հարթակներում։
Հետևեք մեզ տելեգրամում
