Թուրքիայի արտգործնախարար Հաքան Ֆիդանը Վիեննայում Ավստրիայի արտգործնախարար Բեատե Մայնլ-Ռայզինգերի հետ համատեղ ասուլիսի ընթացքում հայտարարել է, որ երկրի՝ Եվրամիությանը անդամակցության ճանապարհին հիմնական խոչընդոտը ոչ թե տեխնիկական չափանիշներն են, այլ Բրյուսելի քաղաքական կամքի բացակայությունը։ Այս մասին հայտնել են թուրքական ԶԼՄ-ները։
Ֆիդանի գնահատմամբ՝ ԵՄ-ի քաղաքական հանձնառությունը Թուրքիայի անդամակցության հարցում փաստացի թուլացել է դեռևս 2007 թվականին՝ Ֆրանսիայի նախկին նախագահ Նիկոլա Սարկոզիի իշխանության շրջանում։ Նրա խոսքով՝ խնդիրը կայանում է նրանում, որ ԵՄ-ում չկա հստակ քաղաքական որոշում Թուրքիան որպես անդամ ընդունելու վերաբերյալ նույնիսկ այն դեպքում, եթե բոլոր չափանիշները կատարվեն։ Արտգործնախարարը նշել է, որ այնուամենայնիվ Անկարան երբեք չի պահանջել հատուկ վերաբերմունք և միշտ պատրաստ է եղել կատարել անդամակցության բոլոր պայմանները։ Նա նաև ընդգծել է, որ տարածաշրջանային զարգացումները ստիպում են կողմերին շարունակել համագործակցությունը՝ անկախ անդամակցության գործընթացի դանդաղումից։
Նա հիշեցրել է, որ Թուրքիայի և ԵՄ-ի միջև առևտրաշրջանառությունը կազմում է մոտ 250 միլիարդ դոլար՝ ընդգծելով, որ մաքսային միության արդիականացումը կարող է այն կրկնապատկել։
Ասուլիսի վերջում Ֆիդանը հավելել է, որ նախագահ Ռեջեփ Թայիփ Էրդողանը շարունակում է աջակցել Եվրոպայի հետ հարաբերությունների խորացմանը։
Հետևեք մեզ տելեգրամում
