ՀՀ կառավարության այսօրվա նիստին ներկայացված նախագծերի համաձայն՝ մայիսի 5-ին պետական այցի շրջանակում Ֆրանսիայի նախագահ Էմանուել Մակրոնը կայցելի Գյումրի: Քաղաքի Վարդանանց հրապարակում տեղի կունենա հայ-ֆրանսիական բարեկամությանը և մշակութային համագործակցության խորացմանը նվիրված մեծ համերգ, որի կազմակերպման նպատակով պետական բյուջեից կհատկացվի շուրջ 393 մլն դրամ:
Հայաստանի պետական սիմֆոնիկ նվագախմբի նվագակցությամբ ելույթ կունենան հայ և ֆրանսիացի անվանի արտիստներ՝ կատարելով երկու ժողովուրդների մշակույթը ներկայացնող թեմատիկ ստեղծագործություններ:
Ըստ կառավարության հայտարարության միջոցառման անցկացման վայրի ընտրությունը պատահական չէ. Գյումրին համարվում է ֆրանսիական մշակույթի և լեզվի նկատմամբ առանձնահատուկ սեր ունեցող քաղաք: Այս ջերմ կապը ձևավորվել է դեռևս 1988 թվականի ավերիչ երկրաշարժից հետո, երբ Ֆրանսիայի ժողովուրդն ու կառավարությունն անգնահատելի աջակցություն ցուցաբերեցին աղետի գոտու վերականգնման գործում: Նախագահ Մակրոնի այցը ևս մեկ անգամ կընդգծի երկու երկրների միջև առկա ամուր պատմական և բարեկամական կապերը:
Հետևեք մեզ տելեգրամում
