Ապրիլի 26-30-ը Հայաստան են այցելել երեք թուրք դիվանագետ՝ նախկին դեսպաններ Հասան Սերվեթ Օքթեմը, Օմեր Օնհոնը և Հասան Գյողյուշը։ Այս մասին պատմել է Հասան Սերվեթ Օքթեմը՝ թուրքական ԶԼՄ-ներից մեկում հրապարակած «Դեպի Հայաստան ճամփորդները» հոդվածում։
Հոդվածում հեղինակը ներկայացրել է դրական տպավորություններ Երևանի մաքրությունից, կարգապահությունից և քաղաքաշինությունից՝ նշելով, որ սրանով ՀՀ մայրաքաղաքը մի քանի քայլ առաջ է Ստամբուլից։ Օքթեմը անդրադարձել է Երևանից բացվող Արարատի տեսարանին՝ նշելով․ «Մեր լեռն է, բայց նրանց մայրաքաղաքից ընդամենը 50-60 կիլոմետր է հեռու և երևում է անզեն աչքով։ Ինձ նաև ասացին, որ Արարատի տեսարանով տներն ավելի թանկ ու արժեքավոր են։ Մեր հյուրանոցի անունը «Hotel Ararat» էր։ Ամենահայտնի հայկական կոնյակի ապրանքանիշն էլ «Արարատ» է»։ Թուրք դիվանագետը ակնարկել է, որ գուցե պետք է արգելել այդ անվան օգտագործումը Հայաստանում։
Դիվանագետը նշել է, որ թուրքական և հայկական կողմերը տարբեր մոտեցումներ ունեն Հայոց ցեղասպանության հարցում՝ ընդգծելով, որ Թուրքիան առաջարկում է ընդհանուր պատմական հանձնաժողով ստեղծել, որը կհետաքննի դեպքերը, և կբացահայտի ճշմարտությունը իսկ հայկական կողմն ասում է՝ քննարկելու բան չկա։ Օքթեմի խոսքով՝ Թուրքիան պատրաստ է «հարգել ընդհանուր ցավերը»։
«Թուրքիան պատրաստ է բարեկամության ձեռք մեկնել Ադրբեջանի հետ խաղաղության պայմանագիր ստորագրած հարևան Հայաստանին, բացել սահմանները, սկսել դիվանագիտական հարաբերություններ և, մի խոսքով, պատրաստ է կարգավորման։ Փաշինյանի առաջնորդած Հայաստանը կշրջվի դեպի Եվրոպա, կմիանա տարածաշրջանային համագործակցությանը և լավ հարաբերություններ կհաստատի հարևանների հետ»,- հավելել է Օքթեմը։
Հետևեք մեզ տելեգրամում
