ՄԱԿ-ի հանձնաժողովն Իսրայելին մեղադրում է Գազայում երեխաների թիրախավորման և հնարավոր ցեղասպանության մեջ

ՄԱԿ-ի անկախ միջազգային հետաքննական հանձնաժողովը հայտարարել է, որ Իսրայելի անվտանգության ուժերը Գազայում դիտավորյալ թիրախավորել են պաղեստինցի երեխաներին՝ ինչի հետևանքով արձանագրվել են պատերազմական հանցագործություններ, մարդկության դեմ հանցագործություններ և հնարավոր ցեղասպանություն։ Այս մասին հայտնում է «Reuters»-ը։

Հանձնաժողովի զեկույցի համաձայն՝ Գազայում զոհվածների մոտ 30%-ը երեխաներ են եղել։ Մասնագետները նշում են, որ դա զգալիորեն բարձր ցուցանիշ է նախորդ հակամարտությունների համեմատ։

Իսրայելի իշխանությունները կտրականապես մերժել են զեկույցի եզրակացությունները՝ այն որակելով որպես «զրպարտչական» և պնդելով, որ իրենք փորձում են նվազագույնի հասցնել քաղաքացիական բնակչության, այդ թվում՝ երեխաների վնասը։ Իսրայելը նաև հայտարարել է, որ զեկույցը չի անդրադառնում ՀԱՄԱՍ-ի գործողություններին։

Հանձնաժողովը, սակայն, նշել է, որ օգտագործվել են ծանր հարվածային զինատեսակներ խիտ բնակեցված շրջաններում, ինչը, ըստ նրանց, հանգեցրել է մեծ թվով երեխաների մահվան։ Զեկույցում նաև ընդգծվում է, որ նման հարձակումները կարող են վկայել դիտավորության մասին։ Բացի Գազայից, զեկույցում անդրադարձ է կատարվել նաև Արևմտյան ափին իրավիճակին՝ նշելով, որ պաղեստինցի երեխաների նկատմամբ գրանցվել է բռնության, խոշտանգումների և վատ վերաբերմունքի դեպքերի աճ, այդ թվում՝ ձերբակալությունների ընթացքում։ Իսրայելը կրկին հերքել է մեղադրանքները՝ պնդելով, որ գործում է անվտանգության սպառնալիքների պայմաններում և փորձում է պաշտպանել քաղաքացիական բնակչությանը։