Էստոնիայի մայրաքաղաք Տալլինում հուլիսի 3-4-ը կանցկացվի «Made in Armenia Expo» ցուցահանդեսը, որի նպատակն է խթանել հայկական արտադրանքի ներկայացվածությունը եվրոպական շուկայում և զարգացնել հայ-էստոնական տնտեսական համագործակցությունը։ Այս մասին հայտնել են ՀՀ արտգործնախարարությունից։
Միջոցառումը տեղի կունենա «Kultuurikatel» մշակութային կենտրոնում, որտեղ իրենց արտադրանքը կներկայացնեն շուրջ 50 հայկական ընկերություններ։
Ցուցահանդեսում կներկայացվի հայկական արտադրանքի լայն տեսականի՝ բարձրորակ սննդամթերք, գինիներ և այլ ալկոհոլային խմիչքներ, պահածոներ, օրգանական գյուղատնտեսական արտադրանք, տեքստիլ, կաշվե իրեր, ինչպես նաև ձեռագործ աշխատանքներ։
Միջոցառումը կազմակերպվում է Լիտվայում Հայաստանի Հանրապետության դեսպանության և Էստոնիայում ՀՀ պատվավոր հյուպատոսի նախաձեռնությամբ՝ «DVIN» էստոնահայ համայնքի հետ համատեղ և Էստոնիայի արտաքին գործերի նախարարության աջակցությամբ։
Ցուցահանդեսը բաց կլինի գործարար համայնքի ներկայացուցիչների, ոլորտային մասնագետների, ինչպես նաև հայկական արտադրանքով և Հայաստանի արտահանման հնարավորություններով հետաքրքրված բոլոր այցելուների համար։
ՀՀ ԱԳՆ-ն նշել է, որ նախարարությունը և Հայաստանի դիվանագիտական ներկայացուցչությունները շարունակում են աշխատանքները միջազգային գործընկերների հետ՝ հայկական արտադրանքի արտահանման ուղղությունների ընդլայնման և հատկապես Եվրոպական միության շուկաներում դրա ներկայացվածության ամրապնդման նպատակով։
Հետևեք մեզ տելեգրամում
