Վրաստանում բանտարկված նախագահ Միխաիլ Սաակաշվիլին հայտարարել է, որ իր համար արհեստական բանականության միջոցով թվային ավատար է ստեղծվում, որը կարող է հանրության առաջ ներկայացնել իրեն, քանի դեռ ինքը գտնվում է բանտում։ Սաակաշվիլիի խոսքով՝ ավատարն արդեն պատրաստվում է գործարկման։ Նա այն նկարագրել է որպես իր թվային տարբերակ, որը կխոսի իր նմանությամբ։
«Ինձ որքան ուզում եք պահեք բանտում։ Ես դուրս կգամ այս բանտից, ինչպես Նելսոն Մանդելան, և անմիջապես կվերադառնամ իշխանության»,- հայտարարել է Սահակաշվիլին՝ նշելով, որ մինչ այդ իր աշխատանքը կարող է կատարել արհեստական բանականությունը։
Նախկին նախագահը նաև հայտարարել է, որ իր քաղաքական վերադարձը կապում է Վրաստանում «Վարդերի նոր հեղափոխության» հնարավորության հետ։
Նշենք, որ Սաակաշվիլին Վրաստանից հեռացել էր 2013 թվականին՝ նախագահական լիազորությունների ավարտից հետո։ «Վրացական երազանք» կուսակցության իշխանության գալուց հետո նրա դեմ մի շարք քրեական գործեր էին հարուցվել։ Այդ ընթացքում նա ապրել է Ուկրաինայում, որտեղ զբաղեցրել է Օդեսայի նահանգապետի պաշտոնը, իսկ ավելի ուշ ղեկավարել է Ուկրաինայի նախագահի՝ բարեփոխումների ազգային խորհրդի գործադիր կոմիտեն։
2021 թվականի հոկտեմբերին Սաակաշվիլին գաղտնի վերադարձել է Վրաստան և ձերբակալվել։ Մի քանի քրեական գործերով նրա նկատմամբ արդեն կան դատավճիռներ, իսկ մյուս գործերը դեռ քննվում են։ 2025 թվականին նրան նոր մեղադրանքներ են առաջադրվել՝ իշխանությունը բռնի կերպով փոխելու կոչերի համար։ Հիշեցնենք, որ ներկայում Սաակաշվիլին պատիժը կրում է Ռուսթավիի բանտում։ Գործող կարգավորումների համաձայն՝ նա ազատ արձակվել կարող է ոչ շուտ, քան 2030 թվականին։
Հետևեք մեզ տելեգրամում
