Եվրոպայում տիրող աննախադեպ շոգի պատճառով Ռումինիայի իշխանությունները ծայրահեղ քայլերի են դիմել։ Երկրի զինված ուժերը Դանուբ գետի ճյուղերից մեկում պայթեցրել են ջրի տակ գտնվող ժայռաբեկորը, որպեսզի փոխեն գետի հոսքն ու «Չեռնավոդա» ատոմային էլեկտրակայանը ապահովեն անհրաժեշտ ջրով։ Այս մասին հայտնում է գերմանական Die Welt պարբերականը:
Պայթեցման աշխատանքներն իրականացվել են Չեռնավոդայից 50 կիլոմետր վերև՝ Իզվոարելեի հատվածում։ Ծրագրի համաձայն՝ պայթյունից առաջացած քարաբեկորները բեռնանավերով տեղափոխվելու և տեղադրվելու են գետի որոշակի հատվածում, որպեսզի բարձրացնեն ջրի մակարդակը և ավելի շատ ջրային հոսք ուղղեն դեպի ԱԷԿ։
Ռումինիայի պաշտպանության նախարար Ռադու Միրուցայի փոխանցմամբ՝ գործողությունն անցել է հաջող։ «Բանակը շուրջ 30 տարի անհաջող փորձում էր հեռացնել Դանուբի այս ժայռը։ Եթե ջրի հունի այս մասնակի շեղումը չօգնի, ԱԷԿ-ը ստիպված կլինենք ամբողջությամբ անջատել արդեն այս հինգշաբթի»,- նախազգուշացրել է նախարարը։
Ջրի պակասի պատճառով «Չեռնավոդա» ԱԷԿ-ի երկու ռեակտորներից մեկն արդեն իսկ անջատվել է անցյալ շաբաթ։ Կայանն ապահովում է Ռումինիայի էլեկտրաէներգիայի պահանջարկի մոտ 20%-ը, ուստի դրա աշխատանքի խաթարումը լուրջ սպառնալիք է երկրի էներգահամակարգի համար։
Իրավիճակը բարդանում է նրանով, որ շոգի պատճառով կտրուկ նվազել է նաև հիդրոէլեկտրակայանների արտադրանքը։ Դանուբում ջրի ծավալն այժմ կազմում է տարվա այս եղանակի համար սովորական ցուցանիշի ընդամենը մեկ երրորդը։
Էներգետիկ ճգնաժամը մեղմելու նպատակով Ռումինիայի վարչապետ Իլիե Բոլոժանը հայտարարել է հատուկ միջոցառումների մասին, մասնավորապես՝ կառավարությունը նախապատրաստում է որոշում, որը թույլ կտա անհրաժեշտության դեպքում սահմանափակել արդյունաբերական խոշոր սպառողների էլեկտրամատակարարումը։ Միաժամանակ, երկրի խոշորագույն ավտոարտադրողները՝ Dacia-ն և Ford-ը, էլեկտրաէներգիա խնայելու նպատակով մինչև օգոստոսի 19-ը դադարեցրել են արտադրությունը։
Իշխանությունները նաև կոչ են անում բնակչությանը խնայողաբար ծախսել էլեկտրաէներգիան՝ նշելով, որ քաղաքացիների արձագանքն արդեն իսկ թույլ է տվել նվազեցնել համազգային սպառման ծավալները։
Հետևեք մեզ տելեգրամում
