Արցախի ներդրումային հիմնադրամի միջոցներով Ասկերանում շարունակվում է բնակելի երեք նոր շենքերի կառուցման աշխատանքները:
«Արցախպրես»-ի թղթակցի հետ զրույցում Ասկերանի քաղաքապետ Հայկ Շամիրյանն ասել է, որ շինաշխատանքները մեկնարկել են 2019 թվականի սեպտեմբերին: Քաղաքապետի խոսքով՝ հինգ հարկանի բնակելի շենքերից երկուսն ունեն նկուղային հարկեր:
«Շինությունները լինելու են ժամանակակից պահանջներին համապատասխան, սեյսմակայուն: Ներկայումս ընթանում է շենքերից մեկի տանիքի, իսկ մյուս երկուսի՝ մանսարդային հարկերի կառուցման աշխատանքները: 2-4 սենյականոց 47 բնակարաններն ապահովված են լինելու շուրջօրյա ջրով և ջեռուցմամբ: Դրանց մի մասը նախատեսված է հատկացնել սոցիալապես անապահով, բազմազավակ, հաշմանդամության կարգ ունեցող, զինվորականների ընտանիքներին, իսկ մի մասն էլ ՝ հիփոթեքային ծրագրով: Կառուցման աշխատանքները կավարտվեն նոյեմբերին, իսկ 2021 թվականին շենքերը շահագործման կհանձնվեն»,-մասնավորապես ասել է Հ. Շամիրյանը: Խոսելով շրջկենտրոնում բնակարանային խնդրի մասին՝ մեր զրուցակիցը նշել է, որ այդ հարցով քաղաքապետարան հայտ է ներկայացրել 106 քաղաքացի. գործընթացը շարունակվում է: Արցախի ներդրումային հիմնադրամը պատրաստակամություն է հայտնել հայտերի ծավալուն լինելու դեպքում ևս երկու նոր շենքի կառուցման աշխատանքներ սկսել 2021 թվականին:
Հետևեք մեզ տելեգրամում
