Ախալքալաքի և Նինոծմինդայի մեծամասնական պատգամավոր Հենզել Մկոյանը իր ֆեյսբուքյան էջում հայտարարություն է տարածել, որտեղ նշում է, որ իր վրա քաղաքական ճնշումներ են գործադրվում, որոնց նպատակը առաջիկա ընտրություններին մասնակցելու գաղափարից հրաժարվելն է:
«Ընտրություններին մնացել է մեկուկես ամիս: Այսօր եղբորս ընկերություն էին եկել ֆինանսական ոստիկանության ու աուդիտի աշխատակիցները:Նրանք կնիքեցին բոլոր համակարգիչները և փաստաթղթերը: Եղբայրս Վրաստանում մեծ հայ գործարար է, նրա մոտ შპს „მეეკი„ և „ეს-ჯი-გაზ„ («Էս-ՋԻ-Գազ») ընկերություններում աշխատում է 300 մարդ, որոնք իրենց ընտանիքների միակ սատարն ու կերակրողն են: Սա ճնշում է գործարարի և բիզնեսի վրա: Այս ամենը քաղաքական բնույթ ունի: Նրանց միակ նպատակը 2020-ի խորհրդարանական ընտրություններից իմ թեկնածությունը հանելն է: Եթե ամեն ինչ այս տեմպով շարունակվի, ապա մենք չենք կարողանա իրականացնել այն ծրագրերը, որոնցով նախատեսված էր գազաֆիկացնել Ախալքալաքի մունիցիպալիտետի Աբուլ և ՆինոծմԻնդայի մունիցիպալիտետի Գոռելովկա գյուղերը,ինչպես նաև այլ ծրագրեր: Ընկերությունը չի կարողանա բնական գազ մատակարարել հասարակությանը, իսկ աշնանը լեռնային այս շրջանի բնակիչները խստաշունչ ձմռան պայմաններում, որը բնորոշ է այս շրջանին, կմնան առանց գազի: Ընկերությունը կսնանկանա, և՛ ընկերությունը, և՛ բնակչությունը մեծ վնասներ կկրի», – ասված է հայտարարության մեջ:
««Էս-ՋԻ-Գազ» ընկերությունը արդեն 14 տարի է ինչ գործում է: Դեռ այն ժամանակների համար դա հայրենասիրական և ժողովրդասիրական քայլ էր, քանի որ նույնիսկ մեր հարևան շրջանները՝ Ախալցիխեն, Ադիգենը, Ծալկան դեռ գազաֆիկացված չէին: Եվ այդ տարիների ընթացքում ոչ մի խախտում չի նկատվել կամ գրանցվել, իսկ հիմա երբ ընտրություններին մնացել է ընդամենը մեկուկես ամիս, երեկ ֆինանսական ոստիկանության աշխատակիցների կողմից ստուգումներ էին անցկացնում: Այս ամենը զուտ քաղաքական բնույթ է կրում: Նրանք ուզում են ոչնչացնել իմ եղբոր ընկերությունը: Այն նպատակաուղղված քայլ է ընդդեմ ինձ: Նրանց քայլերի նպատակն է, որ ես հրաժարվեմ 2020 թվականի խորհրդարանական ընտրություններին մասնակցելուց»,-եզրափակել է վրացահայ պատգամավորը:
Հետևեք մեզ տելեգրամում
