Սիրիան մտադիր է ամբողջությամբ վերականգնել ազգային ինքնիշխանությունը եւ անօրինական է համարում իր տարածքում ցանկացած օտարերկրյա զորքի առկայությունը, ինչը համաձայնեցված չէ հանրապետության կառավարության հետ: Այս մասին հայտարարել է Սիրիայի ԱԳ նախարար Ֆեյսալ Միկդադը՝ ելույթ ունենալով ՄԱԿ-ի Գլխավոր ասամբլեայի 76-րդ նստաշրջանի ընդհանուր քաղաքական բանավեճում:
«Պետք է վերջ դնել այս ամենին, և մենք պահանջում ենք, որ Թուրքիան և Միացյալ Նահանգները դուրս բերեն զորքերը Սիրիայից առանց որևէ նախապայմանի», – ընդգծել է Միկդադը: Նա միաժամանակ նշել է, որ Դամասկոսը «իրեն իրավունք է վերապահում բոլոր օրինական միջոցներով հասնել այդ նպատակին»:
Նրա խոսքով՝ Թուրքիան և ԱՄՆ-ն «կեղծ պատրվակներ են օգտագործում իրենց ռազմական ներկայությունը Սիրիայի հողի վրա շարունակելու և նրա բնական պաշարները թալանելու համար, ինչը հակասում է միջազգային իրավունքին և ՄԱԿ-ի Անվտանգության խորհրդի բանաձևերին»:
Սիրիայի ԱԳ ղեկավարը Թուրքիային մեղադրել է Սիրիայի հյուսիս-արևմուտքում դեէսկալացիայի գոտի ստեղծելու մասին համաձայնագրից բխող պարտավորությունները չկատարելու մեջ:
«Արդյունքում Իդլիբ նահանգը դարձել է այնտեղ ներթափանցած օտարերկրյա ահաբեկիչների ինկուբատոր», – ասել է Միկդադը:
«Այս իրավիճակը չի կարող անվերջ շարունակվել, և Սիրիան վճռական է իր տարածքում ահաբեկչական խմբավորումների ոչնչացումը ավարտին հասցնելու գործում»,- եզրափակել է արտգործնախարարը։
Հետևեք մեզ տելեգրամում
