Ռուսաստանը հայտարարել է, որ մերժում է Իսրայելի ցանկացած փորձ՝ պարտադրելու իր «ինքնիշխանությունը» օկուպացված սիրիական Գոլանի նկատմամբ:
«Ռուսաստանը չի ճանաչում Իսրայելի ինքնիշխանությունը Գոլանի բարձունքների նկատմամբ, այն Սիրիայի անբաժանելի մասն է»,- հայտարարել է ՄԱԿ-ում Ռուսաստանի մշտական ներկայացուցչի տեղակալ Դմիտրի Պոլյանսկին:
Նրա խոսքով՝ Ռուսաստանում անհանգստացած են, որ Գոլանում Իսրայելը ընդլայնում է բնակավայրերի հիմնումը, որը ոտնահարում է 1949 թվականի Ժնևի կոնվենցիայի դրույթները:
Նշենք, որ Իսրայելը գրավել էր Գոլանը 1981 թվականին, բայց մինչ օրս միայն Միացյալ նահանգներն է ճանաչել Իսրայելի ինքնիշխանությունը այդ տարածքի նկատմամբ:
Ուշագրավ է նաև, որ ռուս-ուկրաինական ճգնաժամի նկատմամբ Իսրայելի չեզոք դիրքորոշման փոփոխումից ժամեր անց Ռուսաստանի մշտական ներկայացուցիչը նման հայտարարություն է արել: Իսրայելի արտգործնախարար Յաիր Լապիդը երեկ հայտարարեց, որ դատապարտում է Ռուսաստանի հարձակումը Ուկրաինայի նկատամամբ՝ ավելացնելով, որ դա «միջազգային կարգի կոպիտ խախտում» է, իսկ Իսրայելը պատրաստ է մարդասիրական օգնություն տրամադրել Ուկրաինային:
Հիշեցնենք, որ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հանդես էր եկել ուղերձով՝ հայտնելով Դոնբասում հատուկ ռազմական գործողություն սկսելու որոշման մասին: Նա հավաստիացրել էր, որ Ռուսաստանի պլանների մեջ չի մտնում Ուկրաինայի օկուպացումը, այլ Ռուսաստանը ձգտելու է հասնել Ուկրաինայի «ապառազմականացմանը»։
Հետևեք մեզ տելեգրամում
