Baykar ընկերությունը մտադիր է Ուկրաինայում կառուցել «Բայրաքթար» տեսակի անօդաչու թռչող սարքերի գործարան: Այդ մասին ասել է Թուրքիայում Ուկրաինայի դեսպան Վասիլի Բոդնարը:
Նրա փոխանցմամբ, Baykar-ն Ուկրաինայում արդեն ստեղծել է ընկերություն և կառուցման համար հողամաս է ձեռք բերել:
«Բայրաքթար»-ների արտադրությանը կմասնակցեն շարժիչներ, անիվներ և պահեստամասեր արտադրող ուկրաինական ընկերությունները:
Թուրքիայի և Ռուսաստանի նախագահների վերջին հանդիպումից առաջ Ռեջեփ Թայիփ Էրդողանն ասել է, թե «Վլադիմիր Պուտինը ցանկանում է համագործակցություն հաստատել Baykar ընկերության հետ»: Սակայն ավելի ուշ Թուրքիայի պաշտպանական արդյունաբերության ներկայացուցիչներն ասել են, որ Ռուսաստանի հետ համագործակցության ծրագիր չի քննարկել:
Հուլիսի 18-ին Baykar ընկերության գործադիր տնօրեն Հալուք Բայրաքթարը CNN հեռուստատեսության թղթակցին ասել է, որ սատարում է ինքնիշխանության և անկախության համար պայքարող Ուկրաինային և երբեք թույլ չի տա այդ ԱԹՍ-ները վաճառել Ռուսաստանին:
Ուկրաինայի բանակը 2021 թվականից է ստանում թուրքական արտադրության «Բայրաքթար» ԱԹՍ-ները: Դա նյարդայնացրել է Մոսկվային, և այդ կապակցությամբ Թուրքիան դադարեցրել է տեղեկություններ հրապարակել Ուկրաինային ԱԹՍ-ների վաճառքի մասին:
Հետևեք մեզ տելեգրամում
