Այսօր Ադրբեջանի ԱԳՆ-ն հանդես է եկել հայտարարությամբ, որով «դատապարտել է 2023թ. հունվարի 27-ին Թեհրանում Ադրբեջանի դեսպանության դեմ ահաբեկչական գրոհը դատապարտող միջազգային մի շարք կազմակերպությունների ընդունած հայտարարություններին խոչընդոտելու Իրանի փորձերը»։
Ի պատասխան դրան, Իրանի խորհրդարանի Ազգային անվտանգության հանձնաժողովի փոխնախագահն իրանա-արդբեջանական լարված հարաբերությունների համատեքստում հայտարարել է.
«Ադրբեջանի իշխանությունները պետք է ուշադրություն դարձնեն, որ Իրանի օրակարգում միշտ բարիդրացիականության սկզբունքն է եղել: Իրանի դեմ Ադրբեջանի բողոքը միջազգային կառույցներին թշնամական վարքագիծ է համարվում, և Ադրբեջանը պետք է հարգի չափ ու սահմանները: Իրանն Ադրբեջանի հարավային մեծ հարևանն է, և Ադրբեջանի օգտին չէ իրադրությունը բորբոքել և ստեղծել խնդիրներ, որոնք սպառնում են երկու երկրների միջև մթնոլորտին»։
Նա շեշտել է, որ դեսպանատան վրա հարձակումը պետական հովանավորությամբ չի եղել և անձնական դրդապատճառներով է եղել ու հավելել, որ Իրանի հետ հարաբերությունների վատթարացումից տուժելու է միայն Ադրբեջանը:
«Ադրբեջանի ու Հայաստանի միջև վեճերում մենք օգտնել ենք թուլացնել լարվածությունը, սակայն Ադրբեջանն այլ կերպ է պատասխանում: Իրանի հետ բարեկամությունից առաջին շահողն Ադրբեջանն է, և Իրանի հետ թշնամությունից առաջին տուժողն էլ է Ադրբեջանը: Սիոնիստական ռեժիմը ցանկանում է, որ Ադրբեջանը մոտ ապագայում անցնի սիոնիստների վերահսկողության ներքո: Սա տարածաշրջանում լարվածության սրման պատճառ է դառնում: Ադրբեջանի մեր ընկերները պետք է ուշադրություն դարձնեն, որ սիոնիստական ռեժիմը տեղ է գտել Ադրբեջանում»,-ասել է նա:
Հիշեցնենք, որ ուրբաթ առավոտյան զինված հարձակում էր տեղի ունեցել Իրանում Ադրբեջանի դեսպանատան վրա, սպանվել է դիվանագիտական առաքելության անվտանգության աշխատակիցը, անվտանգության ևս երկու աշխատակիցներ վիրավորվել են։
Հետևեք մեզ տելեգրամում
