Իսրայելում հաջորդ շաբաթ կանցկացվեն մեկ տարվա մեջ երրորդ ընտրությունները՝ հույսով, որ երրորդ փորձից ընտրողները երկիրը դուրս կբերեն քաղաքական փակուղուց: Եվ կրկին ուշադրության կենտրոնում Իսրայելի վարչապետ Բենյամին Նեթանյահուի՝ ոմանց կարծիքով բևեռացված գործիչ լինելու հարցն է:
Իսրայելում ԱՄՆ-ի նախկին դեսպան Դան Շափիրոն ասել է. «Նրա կուսակցությունը և իր ճամբարից շատերը նրան տեսնում են որպես գրեթե անփոխարինելի գործիչ, մարդ, որը երկիրը զերծ է պահել տարածաշրջանում տարատեսակ սպառնալիքներից, և որ բացի նրանից գրեթե ոչ մեկին չեն պատկերացնում երկրի ղեկավարի պաշտոնում, որը շուրջ 11 տարի է ղեկավարել երկիրը։ Իսկ մյուս ճամբարում համարում են, որ նա, որպես առաջնորդ, այդ տարիների ընթացքում արդեն անցել է ընդունելի լինելու սահմանները։ Նրանք կենտրոնացել են այն փաստի վրա, որ վարչապետին մեղադրանք է առաջադրված և շուտով դատարանի առաջ կկանգնի կոռուպցիոն տարբեր հոդվածներով: Մեղադրյալներն էլ հենց Նեթանյահուի ճամբարից են»:
Ինչպես նախորդ տարվա երկու ընտրությունները, այս անգամ ևս ո՛չ Նեթանյահուն և նրա «Լիքուդ» կուսակցությունը, և ո՛չ նրա մրցակից Բենի Գանցը կարծես թե չեն կարողանա մեծամասնություն կազմել 120 հոգուց բաղկացած խորհրդարանում:
«Ըստ էության երեք ընտրություններն էլ մեկ անձի պատճառով են: Որովհետև, եթե Նեթանյահուն հեռանա, Գանցը և «Լիքուդ» կուսակցությունը կարող են կոալիցիոն կառավարություն ձևավորել մեկ շաբաթում»,-ասում է Ազգային անվտանգությոան ուսումնասիրությունների ինստիտուտից Յահուդա Բեն Մեյրը:
Թել Ավիվի համալսարանի ուսանողներն ու աշխատակիցները հիասթափված են քաղաքական փակուղուց:
«Մենք խրված ենք մի տեղում, որտեղից չենք կարողանում առաջ շարժվել: Կարծես շրջան լինի, որը երբեք չի ավատվում»,- նշել է թատերական բաժնի ուսանող Ավիշա Նամիրովսկին:
«Իմ ամենամեծ մտահոգությունը «Կապույտ և սպիտակ» դաշինքի ու «Լիքուդ» կուսակցության միջև տարբերությունը չէ: Ես մտահոգված եմ կառավարությունում ճշմարտության և ազնվության խնդրով, կառավարության գործունեությունը չպետք է կոռումպացված լինի»,- ասել է համալսարանի աշխատակից Յիցակ Զիմերմանը:
«Որպես արաբ, ինձ համար ամենակարևորն այստեղ ռասիզմին վերջ տալն է: Այստեղ արաբների նկատմամբ մեծ խտրականություն կա: Ես մարդ եմ, որը չի տարբերվում ոչ մեկից և ուզում եմ, որ ինձ այդպես էլ վերաբերվեն»,-ասում է ապագա բուժքույր Մադլեն Օթմանը:
Այդուհանդերձ հանրությունը կքվեարկի այս ընտրություններին, և Նեթանյահուի ճակատագիրը կորոշվի՝ կախված իրեն ուղղված կոռուպցիոն մեղադրանքների դատավարությունից, որը նախատեսվում է սկսել ընտրություններից երկու շաբաթ հետո: Այս մասին հայտնել է «Ամերիկայի Ձայնը»:
Հետևեք մեզ տելեգրամում
