Իրանի նախագահ Հասան Ռոհանին հեռախոսազրույցի ընթացքում Ռուսաստանի նախագահ Վլադիմիր Պուտինին առաջարկել է Սիրիայի հարցով հաջորդ գագաթնաժողովն անցկացնել Իրանի Իսլամական Հանրապետությունում:
Այս մասին մարտի 3-ին Ռուսաստանի Դաշնության խորհրդի արտաքին հարաբերությունների հանձնաժողովի նախագահ Կոնստանտին Կոսաչյովի հետ հանդիպման ժամանակ հայտնել է ՌԴ-ում Իրանի դեսպան Քազեմ Զալալին:
«Մի քանի օր առաջ հեռախոսազրույց է տեղի ունեցել նախագահներ Ռոհանիի և Պուտինի միջև: Հեռախոսազրույցի շրջանակներում նախագահ Ռոհանին հրավիրել է նախագահ Պուտինին… որպեսզի Աստանայի ձևաչափի շրջանակներում հաջորդ գագաթնաժողովը անցկացվի Իրանում»,- ասել է Կոսաչյովը:
Դիվանագետը շեշտել է Աստանայի ձևաչափի հաջողությունը և ուշադրություն հրավիրել այն հանգամանքի վրա, որ մասնակիցները «պետք է հավատարիմ լինեն դրան և շարունակեն համագործակցությունը դրա շրջանակներում»:
Նա նաև նշել է Ռուսաստանի և Իրանի համագործակցության առանձնահատուկ դերը ահաբեկչության դեմ պայքարում:
«Այս կամ այլ կոալիցիաներ են ստեղծվել ահաբեկչության դեմ պայքարի համար: Սակայն դրանցից ոչ մեկը չի կարողացել հաջողությամբ պայքար մղել ահաբեկչության դեմ, և միակ կոալիցիան, որը հաջող է եղել և իրականում պայքարել է ահաբեկչության դեմ, Իրանի և Ռուսաստանի կոալիցիան է»,- ընդգծել է դեսպանը։
Հետևեք մեզ տելեգրամում
