Լիբանանի իշխանությունները վախենում են, որ Իսրայելի հետ հրադադարը կարող է տապալվել, քանի որ հրեական պետությունը խախտում է համաձայնագիրը։ Այս մասին գրում է էմիրաթական The National թերթը՝ վկայակոչելով լիբանանյան քաղաքական շրջանակներում իր աղբյուրներին։
Ըստ լիբանանցի պաշտոնյաների՝ նոյեմբերի 27-ից ի վեր, երբ ստորագրվեց համաձայնագիրը հակամարտող կողմերի միջև, Իսրայելը պայմանավորվածությունը խախտել է ավելի քան 300 անգամ։ «Իրավիճակը շատ վատ է, իշխանական շրջանակներում այն տպավորությունն է, որ Իսրայելն այլևս չի ցանկանում այս գործարքը կամ պատրաստվում է մշտական օկուպացիայի»,- ասել է աղբյուրը։ Ըստ թերթի աղբյուրների, Լիբանանը «կրկին պատրաստվում է հակամարտության ամենավատ սցենարին»։
«Այն, ինչ տեղի է ունենում Սիրիայում, կապված է Լիբանանի հետ՝ հաշվի առնելով, որ Իսրայելի վարչապետ Բենիամին Նեթանյահուն այժմ զգում է, որ ի վիճակի է անել այն, ինչ ցանկանում է, և, հետևաբար, նա չի լքի Լիբանանը, և ոչինչ չի խանգարում նրան»,-ասել է Լիբանանի ներքին գործերի նախկին նախարար Մարվան Շարբելը՝ նշելով, որ այժմ հրեական պետության նպատակը «կարող է լինել ավելի շատ հողերի տիրանալը»։
Հետևեք մեզ տելեգրամում
