Լիբանանի ԱԳՆ-ն առաջիկա օրերին Լիբանանում Իրանի դեսպան Մոջթաբա Ամանիին կկանչի նախարարաություն՝ Լիբանանից զենքի հեռացման մասին վերջինիս գրառման համար։
«Զինաթափման նախագիծը բացահայտ դավադրություն է ազգերի դեմ: Մինչ Միացյալ Նահանգները շարունակում է սիոնիստական ռեժիմին մատակարարել նորագույն զենքեր և հրթիռներ, այն թույլ չի տալիս երկրներին զինել և ուժեղացնել իրենց բանակները, ինչպես նաև ճնշում է այլ երկրներին՝ նվազեցնելու կամ ոչնչացնելու իրենց զինանոցը տարբեր պատրվակներով»,-գրել է Ամանին X հարթակում:
«Երբ այս երկրները հանձնվում են զինաթափման պահանջներին, նրանք խոցելի են դառնում հարձակման և օկուպացիայի համար, ինչպես եղավ Իրաքում, Լիբիայում և Սիրիայում»,-նախազգուշացրել է Ամանին՝ շեշտելով, որ Իրանի Իսլամական Հանրապետությունում գիտակցում են այս դավադրության լրջությունը և տարածաշրջանի ժողովուրդների անվտանգությանը սպառնացող վտանգը:
«Մենք զգուշացնում ենք մյուսներին թշնամու ծուղակն ընկնելուց: Զսպումը ինքնիշխանության և անկախության պաշտպանության առաջին գիծն է և չպետք է զիջվի»,-եզրափակել է Ամանին։
Հիշեցնենք, որ օրեր առաջ Լիբանանի նախագահ Ջոզեֆ Աունը հայտարարել է, որ «Հեզբոլլահ»-ը չի ձգտում պատերազմել Իսրայելի հետ և հույս է հայտնել, որ երկրում գտնվող ողջ զենքը պետության վերահսկողության տակ կհայտնվի 2025 թվականի ավարտին։
Հետևեք մեզ տելեգրամում
