«Լրագրողներ առանց սահմանների» կազմակերպությունը (RSF) Ադրբեջանում լրատվամիջոցների նկատմամբ ճնշումների ֆոնին ստեղծել է պատկերասրահ՝ ներկայացնելով այն լրատվական մասնագետների անձնական պրոֆիլները, ովքեր կամայականորեն բանտարկվել են հանրությանը տեղեկություն տրամադրելու ձգտման համար: Ընդգծվել է, որ Իլհամ Ալիևի ռեժիմը խորանում է ավտորիտարիզմի մեջ, անկախ լրատվամիջոցների նկատմամբ ճնշումները հասնում են աննախադեպ մակարդակի:
«2023 թվականի նոյեմբերից սկսած ձերբակալությունների ալիքը թիրախավորել է այն լրագրողներին, ովքեր հրաժարվում են ենթարկվել գրաքննությանը: Ավելի քան երկու տասնամյակ Ադրբեջանի նախագահ Իլհամ Ալիևը մեթոդաբար ոչնչացրել է մեդիա բազմակարծությունն իր երկրում, և այս ճնշումն ավելի է սաստկացել 2023 թվականի աշնանից: Լեռնային Ղարաբաղի հակամարտությունից հետո իշխանությունները փորձում են արմատախիլ անել անկախ մամուլի մնացորդները: Հիմնականում մեղադրվելով «արժույթի մաքսանենգության» մեջ՝ ըստ էության, արտասահմանյան կազմակերպություններից դրամաշնորհներ ստանալու համար, բազմաթիվ լրագրողներ տառապում են բանտերում պարզապես իրենց աշխատանքը կատարելու կամ մամուլի ազատության համար պայքարելու համար»,-նշված է զեկույցում:
Հետևեք մեզ տելեգրամում
