Հունիսի 18-ին Թուրքիայի Ազգային Մեծ Ժողովում տեղի է ունեցել լարված միջադեպ՝ Հայոց ցեղասպանության թեմայով ծագած քննարկման ժամանակ։ Քրդամետ «Հավասարության և ժողովրդավարության ժողովրդական կուսակցության»(DEM) պատգամավոր Ջորջ Ասլանը Մեջլիսի ընդհանուր նիստում ելույթի ժամանակ անդրադարձել է Անկարայի քաղաքապետարանի՝ Թալաթ փաշայի արձան կանգնեցնելու վերաբերյալ նախաձեռնությանը՝ նշելով, որ դա վիրավորական քայլ է 1915 թվականին սպանված ու տեղահանված հազարավոր քրիստոնյա ժողովուրդների՝ հատկապես հայերի հիշատակի հանդեպ։
Ասլանը մասնավորապես ասել է. «1915 թվականին Օսմանյան կայսրության բնակչությունը 13 միլիոն էր, որից մոտ 3 միլիոնը քրիստոնյաներ էին՝ հայեր, հույներ, ասորիներ։ 2025 թվականին, երբ Թուրքիայի բնակչությունը հասել է 86 միլիոնի, բնական է, որ քրիստոնյաների թիվն էլ պետք է միլիոնների հասներ։ Բայց այսօր նրանց թիվը գնահատվում է տասնյակ հազարներ։ Ի՞նչ պատահեց այդ մարդկանց։ Որևէ պատասխան չի տրվում։ Մենք սպասում ենք անկեղծ առերեսման, բայց դրա փոխարեն հանրային վայրերում պատվում են այդ գործողությունների պատասխանատուներին։ Հայերի համար, ովքեր 1915-ին սպանվել, տեղահանվել և զրկվել են իրենց ունեցվածքից, պետք է հուշարձան կանգնեցվի, մինչդեռ դրա փոխարեն արձան է կանգնեցվում այն անձի համար, ով տվել է այդ սպանությունների հրամանը։Մի ժողովրդի համար որոշ անձինք կարող են հերոս համարվել, սակայն այլ ժողովուրդների համար նրանք ոչ թե հերոս են, այլ՝ մարդասպան։»։
Այս ելույթը սուր արձագանք է ստացել մեջլիսում։ Մեջլիսի փոխնախագահ Թեքին Բինգյոլը փորձել է ընդհատել Ասլանի ելույթը, սակայն վերջինս շարունակել է խոսքը։ Նրան կոշտ հակադարձել է ընդդիմադիր «İYİ» կուսակցության կուսակցության պատգամավոր Շենոլ Սունաթը, ում խոսքը նույնպես ընդհատվել է Բինգյոլի կողմից՝ միկրոֆոնը անջատելով։ Դրանից հետո միջամտել է «İYİ» կուսակցության քարտուղար Յասին Օզթյուրքը, ով հարվածել է սեղանին և քայլել դեպի Բինգյոլը, ինչից հետո նիստը ընդհատվել է։Միջադեպից հետո «İYİ» կուսակցության նախագահ Մուսավաթ Դերվիշօղլուն դիմել է Մեջլիսի նախագահությանը՝ պահանջելով « Հայոց ցեղասպանություն» արտահայտության օգտագործման համար Ջորջ Ասլանին ժամանակավորապես երեք նիստերից հեռացնել և նրա ելույթը հանել Մեջլիսի պաշտոնական արձանագրությունից։ Դերվիշօղլուն այդ պահանջը հրապարակել է սոցցանցերում։
Դիմումում մասնավորապես ասվում է․ «DEM կուսակցության պատգամավոր Ջորջ Ասլանը հնչեցրել է հայտարարություն, որը ուղղված է թուրք ժողովրդի պատմությանն ու ազգային հիշողությանը։ Նման հայտարարությունները ուղղակիորեն հարվածում են մեր պետության հիմքերին»։
Հետևեք մեզ տելեգրամում
