Գազայի հատվածի առողջապահական իշխանությունները հայտնել են, որ հուլիսի 1-ի լուսաբացից ի վեր անկլավում իսրայելական բանակի գնդակոծությունների հետևանքով զոհվել է 24 պաղեստինցի, որոնցից 11-ը՝ օգնության բաշխման կենտրոնների մոտ հավաքված ամբոխի թիրախավորման հետևանքով։ «Արմենպրես»-ի փոխանցմամբ՝ այս մասին հայտնում է Al Jazeera-ն։
Այսպիսով, մեկ օրվա զոհերի թիվը հասել է 95-ի, որից 39-ը զոհվել է Գազայի հյուսիսում գտնվող ծովափնյա սրճարաններից մեկի թիրախավորման հետևանքով։
ՀԱՄԱՍ շարժման առաջնորդներից Ուսամա Համդանն Al Jazeera-ին տված հարցազրույցում նշել է, որ շարժումը միջնորդների միջոցով ներկայացրել է համապարփակ տեսլական, որը կհանգեցնի համապարփակ համաձայնագրի, ներառյալ Գազայի հատվածի վրա ագրեսիայի դադարեցման, անցակետերի բացման: Նրա խոսքով, սակայն, Իսրայելը «անզիջում կերպով խանգարել է դրան»։
Նա նշել է, որ օրական մահացությունների թիվը հասնում է 100-ի՝ հավելելով, որ շարժումը շարունակում է արձագանքել ագրեսիային։
Գազայի առողջապահության նախարարությունը հաստատել է մենինգիտի հարյուրավոր դեպքեր՝ մտահոգություն հայտնելով հիվանդության տարածման առնչությամբ։
Ըստ գերատեսչության՝ 2023 թվականի հոկտեմբերի 7-ից ի վեր Իսրայելի կողմից Գազայի հատվածում իրականացված ագրեսիայի հետևանքով զոհերի թիվը հասել է 56 500-ի, իսկ վիրավորներինը՝ 133 642-ի։
Իսրայելը Գազայի հատվածում ռազմական գործողություններ էր սկսել՝ ի պատասխան պաղեստինյան ՀԱՄԱՍ շարժման զինյալների ներխուժման, որի հետևանքով զոհվել էր գրեթե 1200 մարդ, գերեվարվել՝ շուրջ 250 մարդ։
Հետևեք մեզ տելեգրամում
