Բաքվում ձերբակալվել է ռուսական «Ruptly» վիդեոգործակալության լրագրող Այթեկին Հուսեյնովան, որը նկարահանել է «Sputnik Ադրբեջան»-ի գրասենյակում խուզարկությունը։
«Հունիսի 30-ին մեր խմբագիր Այթեկին Նադիրովնա Հուսեյնովան, խմբագրության խնդրանքով, գնացել է Բաքվի «Sputnik Ադրբեջան»-ի գրասենյակ՝ փողոցից նկարահանելու շենքում տեղի ունեցող խուզարկությունները»,-ասվում է հայտարարության մեջ։
Հաղորդվում է, որ Հուսեյնովան Ռուսաստանի Դաշնության և Ադրբեջանի քաղաքացի է։
«Ruptly»-ն ռուսական «RT» հեռուստաալիքի ստորաբաժանում է, որն իր հերթին «Россия сегодня» քարոզչական մեդիա հոլդինգի մաս է կազմում։ Sputnik գործակալությունը նույնպես այս հոլդինգի մաս է:
Հիշեցնենք, որ Ադրբեջանի իրավապահ մարմինները ռուս-ադրբեջանական հարաբերությունների լարվածության ֆոնին, գործողություն էին իրականացրել «Sputnik Ադրբեջան» գործակալության Բաքվի գրասենյակում։ Ավելի ուշ ադրբեջանական լրատվամիջոցները տեղեկություններ էին տարածել, որ«Sputnik Ադրբեջան»-ում աշխատող Ռուսաստանի ԱԴԾ 2 «գործակալ է ձերբակալվել»։
Հետևեք մեզ տելեգրամում
