Մարոկկոյի դատախազությունը մեղադրանք է առաջադրել մոտ 200 մարդու սեպտեմբերի 27-ից ընթացող փողոցային բողոքի ցույցերի ժամանակ բռնի գործողություններին մասնակցելու համար։
Իշխանությունները պնդում են, որ երկրում տեղի ունեցած «չարտոնված բողոքի ցույցերը» ուղեկցվել են խաղաղ ցույցերի բնույթին չառնչվող գործողություններով։ Մասնավորապես, մասնակիցները կատարել են տարբեր հանցագործություններ, այդ թվում՝ քարեր նետել իրավապահ մարմինների աշխատակիցների վրա, ոչնչացնել գույքը, վնասել տրանսպորտային միջոցները և առևտրային հաստատությունները, թալանել և հրկիզել կառավարական մեքենաները։
Ըստ դատախազության՝ անօրինական գործողություններին ներգրավվածների թվում եղել են անչափահասների խմբեր։
Սեպտեմբերի 27-ից Մարոկկոյի տարբեր քաղաքներում տեղի են ունենում փողոցային երթեր և բողոքի ցույցեր: Դրանք կազմակերպվում են սոցիալական ցանցերում ստեղծված GenZ212 երիտասարդական խմբի կողմից: Դրա ակտիվիստները պահանջում են, որ կառավարությունը արմատապես բարեփոխի կրթական և առողջապահական համակարգերը, վճռականորեն պայքարի կոռուպցիայի և գործազրկության դեմ, ապահովի քաղաքացիների համար արժանապատիվ կենսամակարդակ: Փողոցային ցույցերի ժամանակ լսվող ամենատարածված կարգախոսներից մեկը «Արժանապատվություն, ազատություն, սոցիալական արդարություն» է:
Հետևեք մեզ տելեգրամում
