Իրանի սահմանապահ ծառայության ղեկավար Ահմադ Ալի Գոդարզին հայտարարել է, որ 12-օրյա պատերազմի ընթացքում Իրանը պարբերաբար բողոք է հղել Իսրայելի կողմից հարևան որոշ երկրների սահմաններն օգտագործելու առնչությամբ։
«Տարածաշրջանի երկրները չպետք է թույլ տան, որ իրենց տարածքն օգտագործվի այլ երկրների դեմ ագրեսիայի համար։ ԻԻՀ սահմանապահ ծառայությունը ուշադիր հետևում է նման տեղաշարժերին։ Հարևան երկրներին մեր մտահոգությունները փոխանցելուց զատ,մենք վերահսկում ենք բոլոր տեղաշարժերը, և սահմանները լիովին անվտանգ են»,-ասել է Ալի Գոդարզին:
Նա նշել է, որ հարևան երկրների տարածքից բոլոր թռչող սարքերի մուտքը փաստագրվել և ուղարկվել է ԶՈւ ԳՇ։ Իրանի սահմանապահ ծառայության ղեկավարն ընդգծել է, որ ամենաշատ մուտքը եղել է հյուսիսից, հյուսիս-արևմուտքից և արևմուտքից։
«Դեպքերից մեկում հարևան երկիրը տեղեկացվել է կվադրոկոպտերներ տեղափոխող միկրոավտոբուսի մասին, և հարևան երկրի սահմանապահների ժամանակին ձեռնարկված գործողությունների շնորհիվ այդ ահաբեկիչներից երեքը սպանվել են։ Բոլոր տեղաշարժերը ֆիքսվել և փաստագրվել են»,-ասել է Գոդարզին։
Հետևեք մեզ տելեգրամում
