Թուրքիայում ընդդիմադիր քրդամետ «Ժողովուրդների դեմոկրատական» կուսակցությունից (HDP-ԺԴԿ) ընտրված հայ պատգամավոր Կարո Փայլանը, պատգամավորներ՝ Էրոլ Քաթըրջըօղլուի և Նեջդեթ Իփեքյուզի հետ միասին խորհրդարան (մեջլիս) է ներկայացրել մի նախագիծ, որով առաջարկվում է վերանայել 2020թ․ հաստատված Թուրքիայի պետական բյուջեի մասին օրենքը։
Կորոնավիրուսի դեմ պայքարում իրականացվող միջոցառումների շրջանակում Փայլանը նշել է, որ հնարավոր է կրճատել, մասնավորապես Թուրքիայի նախագահականին, անվտանգությանը և կազմակերպություններին բյուջեով հատկացվող երաշխիքային վճարները, փոխարենը 6 ամսվա ընթացքում 2․500 թուրքական լիրայի չափով (166.250 դրամ) օգնություն տրամադրել գործազուրկներին, արհեստավորներին, ուսանողներին և թոշակառուներին։
Փայլանը ուշադրություն է հրավիրել այն հանգամանքի վրա, որ համավարակի պատճառով Թուրքիայում միլիոնավոր քաղաքացիներ են համալրել գործազուրկների շարքերը։
«Իմ տվյալներով լրացուցիչ 5 մլն գործազուրկ կա։ Առաջիկայում որևէ երաշխիք չկա, որ քաղաքացիներն իրենց աշխատանքը չեն կորցնի։ Տնտեսության անիվն անվտանգ է պտտվում, սակայն իշխանությունը ոչնչացրեց այդ վստահությունը»,-ասել է նա։
Նա պահանջել է, որպեսզի բյուջեից 30 մլրդ թուրքական լիրայի չափով կրճատում անել, զուգահեռ նշելով, որ տվյալ բյուջեից գումարներ է հատկացվում Թուրքիայի նախագահականին, որոնք ուղղվում են Էրդողանի ամառանոցների և ձմեռանոցների, ինքնաթիռների վրա, իսկ մյուս մասն էլ քողարկվում։ Նրա խոսքով՝ Թուրքիայի նախագահական պալատի ծախսերը 40 մլրդ լիրա է, իսկ անվտանգության համար հատկացվող ծախսերը՝ 200 մլն լիրա։
Փայլանն, անդրադառնալով Թուրքիայում գնաճի թեմային, հայտնել է, որ 30-40 տոկոսով բարձրացել են սննդամթերքի գները։ Նա ընդգծել է, որ Թուրքիայի վիճակագրական ծառայության՝ դեֆիցիտի վերաբերյալ հրապարակած տվյալները չեն համապատասխանում իրականությանը։
Հետևեք մեզ տելեգրամում
