Ներքին գործերի նախարարության լայնածավալ գործողությունների արդյունքում մարվել են Գեղարքունիքի, Տավուշի, Լոռու, Շիրակի, Կոտայքի, Արագածոտնի, Սյունիքի մարզերի բուսածածկ և խոտածածկ տարածքներում բռնկված հրդեհների բոլոր օջախները։ Այդ մասին հայտնել են նախարարությունից:
Հրդեհաշիջման աշխատանքներին մասնակցել է ավելի քան 2700 փրկարար ծառայող, ինչպես նաև Շրջակա միջավայրի նախարարության, Էկոպարեկային ծառայության, ՆԳՆ ոստիկանության ստորաբաժանումներ, պետական կառավարման և տեղական ինքնակառավարման մարմինների ներկայացուցիչներ, համայնքների բնակիչներ։ Գործողություններին ներգրավվել են 65 հիմնական և մոտ 260 օժանդակ տեխնիկա, ինչպես նաև ՊՆ ուղղաթիռ, որն իրականացրել է 109 թռիչք՝ օդից հետախուզության և հրդեհաշիջման նպատակով։
Առաջին զանգը զանգվածային հրդեհների վերաբերյալ ստացվել է նոյեմբերի 21-ին։ Մարտունու, Վարդենյաց լեռնանցքի, Զոլաքարի, Լճաշենի և մի շարք այլ վայրերում բռնկված հրդեհները մարելու համար ՆԳՆ Փրկարար ծառայությունն անմիջապես ձեռնամուխ է եղել գործողություններին։ Հրշեջ-փրկարարներին հաջողվել է մինչև նոյեմբերի 25-ը լիովին մեկուսացնել հրդեհները նշված վայրերում՝ կանխելով կրակի տարածումը դեպի անտառներ և բնակելի գոտիներ։
Նոյեմբերի 22-24-ը ահազանգեր են ստացվել նաև Տավուշի մարզի Նավուր բնակավայրի և Դիլիջան քաղաքի հարակից անտառածածկ տարածքներում բռնկված հրդեհների մասին։ Դրանք մարելու համար նույնպես իրականացվել են մասշտաբային գործողություններ։ Դիլիջանի ոլորանների և «Լեռնային Հայաստան» առողջարանի մերձակայքում արձանագրված հրդեհները նույնպես հաջողվել է մարել։ Հրշեջներին հաջողվել է կանխել կրակի տարածումը առողջարանային հատված և բնակելի տներ։
ՆԳՆ Փրկարար ծառայությունը շարունակում է հսկողությունը՝ բացառելու հնարավոր նոր բռնկումները։
Ներքին գործերի նախարարությունը կոչ է անում խստորեն հետևել հրդեհային անվտանգության կանոններին, ցուցաբերել զգոնություն։
Հետևեք մեզ տելեգրամում
