«Գեղարդ» հիմնադրամը հրապարակել է փաստական նյութեր, որոնք վկայում են Լեռնային Ղարաբաղում գտնվող հայկական քրիստոնեական հուշարձանների նկատմամբ Ադրբեջանի կողմից իրականացվող վանդալիզմի հերթական դրսևորման մասին։ Հիմնադրամի տվյալներով՝ այս անգամ վանդալիզմի է ենթարկվել Մարտակերտի շրջանի Վաղուհաս գյուղի Սուրբ Մարիամ Աստվածածին եկեղեցին։
Ըստ հրապարակված նյութերի՝ ադրբեջանական կողմը վնասել է եկեղեցու բակում տեղադրված խաչքարերից առնվազն մեկը, ինչպես նաև պոկել է եկեղեցու սրբապատկերները։ «Գեղարդ» հիմնադրամը նշում է, որ այս գործողությունները հերթական դրսևորումն են Լեռնային Ղարաբաղում հայկական մշակութային ժառանգության ոչնչացման և հայկական ինքնության հետքերի վերացման հետևողական քաղաքականության։
Հիմնադրամի գնահատմամբ՝ Ադրբեջանը շարունակաբար ոչնչացնում է տարածաշրջանում հայկական բնիկության վկայությունները՝ դրանք ծառայեցնելով իր քաղաքական և տարածաշրջանային հավակնություններին։ Միաժամանակ ընդգծվում է, որ միջազգային այն կառույցները և շրջանակները, որոնք հայտարարում են քրիստոնեական արժեքների պահպանման կարևորության մասին, փաստացի անտեսում են համընդհանուր քրիստոնեական ժառանգության մաս կազմող հայկական հուշարձանների պահպանման խնդիրը։
Հետևեք մեզ տելեգրամում
