Ապրիլի 16-ին ՌԴ արտաքին գործերի նախարարության պաշտոնական ներկայացուցիչ Մարիա Զախարովան հանդես է եկել կոշտ հայտարարությամբ՝ զգուշացնելով Վրաստանին Եվրոպական միությանն անդամակցելու հնարավոր հետևանքների մասին։ Ըստ Զախարովայի՝ ԵՄ անդամակցությունը ցանկացած երկրի համար նշանակում է «բռնի միացում» հակառուսական պատժամիջոցներին, ինչը Մոսկվան համարում է անօրինական։ Փոխանցում է Newsgeorgia լրատվական կայքը:
Զախարովան հստակեցրել է, թե դա ինչ է նշանակում Վրաստանի համար. «Օրինակ՝ Ռուսաստանի հետ ավիահաղորդակցության դադարեցում, խիստ վիզային ռեժիմի սահմանում: Ռուսաստանը ստիպված կլիներ ներառել՝ ես չեմ ասում, թե մենք ցանկանում ենք դա անել, բայց, հաշվի առնելով ԵՄ նոր պահանջները, ստիպված կլինեինք Վրաստանին ներառել ոչ բարեկամական ռեժիմներ ունեցող երկրների ցանկում և նրա վրա տարածել մեր պատասխան տնտեսական միջոցները՝ դրանից բխող բոլոր հետևանքներով վրացական հանքային ջրերի, մրգերի, գինու և այն ամենի արտադրողների համար, ինչ ներկրվում է մեր երկիր»,- հայտարարել է Զախարովան։
Զախարովան ընդգծել է, որ «Բրյուսելը Վրաստանին մղում է դեպի անդունդը՝ պարտադրելով սեփական մշակույթից ու ինքնությունից հրաժարում և հրահրելով նոր հակառուսական ռազմական արկածախնդրություններ»։
Չնայած Բրյուսելի հետ լարված հարաբերություններին և այն փաստին, որ Եվրահանձնաժողովը դե-ֆակտո կասեցրել է Վրաստանի անդամակցության գործընթացը, այդ երկրի իշխանությունները շարունակում են պնդել, որ իրենց նպատակը մինչև 2030 թվականը ԵՄ-ին անդամակցելն է։ Եվրոինտեգրման ձգտումն ամրագրված է երկրի սահմանադրությամբ, թեև պաշտոնական Թբիլիսին հայտարարել էր բանակցությունները մինչև 2028 թվականը սառեցնելու մասին։
Հետևեք մեզ տելեգրամում
