Թրամփը Իրանի պատասխան առաջարկը որակել է «բացարձակապես անընդունելի»

ԱՄՆ նախագահ Դոնալդ Թրամփը Իրանի կողմից ներկայացված խաղաղության առաջարկի արձագանքը գնահատել է որպես «բացարձակապես անընդունելի»։ Իրանի պատասխանին անդրադառնալով՝ Թրամփը իր «Truth Social» էջում գրել է, որ չի ընդունում Թեհրանի դիրքորոշումը՝ նշելով․ «Հենց նոր կարդացի Իրանի ներկայացուցիչների պատասխանը։ Ես դա չեմ հավանում․ այն բացարձակապես անընդունելի է», սակայն չի հստակեցրել՝ արդյոք իրավիճակը կարող է հանգեցնել ռազմական գործողությունների վերսկսման։

Նշենք, որ «Tasnim» գործակալությունը ներկայացրել էր Թեհրանի պատասխան առաջարկի մանրամասները։ Ըստ հրապարակման՝ Իրանը պահանջում է չեղարկել բոլոր պատժամիջոցները, վերացնել ծովային շրջափակումները և բացառել հետագա ռազմական հարվածները՝ թե՛ Իրանի, թե՛ Լիբանանի ուղղությամբ։

Մինչ այս զարգացումները, Սպիտակ տան ղեկավարը նաև հարցազրույցներից մեկում չէր բացառել իրավիճակի ռազմական սրման հավանականությունը։ Նա նշել էր, որ ամերիկյան կողմը չի հայտարարել գործողությունների ավարտի մասին՝ հավելելով, որ անհրաժեշտության դեպքում հնարավոր է նոր հարվածների շարք՝ ընդգծելով, որ կարող են ևս մի քանի շաբաթով վերադառնալ և թիրախավորել ցանկացած օբյեկտ։