ՀՀ փոխվարչապետ Մհեր Գրիգորյանն ընդունել է Ամերիկայի Միացյալ Նահանգների պատվիրակությանը, որը ժամանել է Հայաստան՝ քննարկելու TRIPP նախագծի իրականացման ուղղությամբ տարվող աշխատանքների ընթացքը։ Այս մասին հայտնում են ՀՀ կառավարության մամուլի ծառայությունից։
ԱՄՆ պատվիրակության կազմում ընդգրկված են եղել ԱՄՆ պետքարտուղարության, ինչպես նաև Զարգացման ֆինանսական կորպորացիայի (DFC) ներկայացուցիչները։
Ողջունելով հյուրերին՝ փոխվարչապետը ՀՀ կառավարության անունից շնորհակալություն է հայտնել ԱՄՆ իշխանություններին 2025 թվականի օգոստոսի 8-ին Վաշինգտոնում տեղի ունեցած խաղաղության գագաթնաժողովի կազմակերպման համար և ընդգծել է այդ հանդիպման կարևոր ձեռքբերումներից մեկի՝ «Թրամփի ուղի՝ հանուն միջազգային խաղաղության և բարեկեցության» նախագծի հետևողական իրագործման անհրաժեշտությունը։
Հանդիպման ընթացքում կողմերը քննարկել և համաձայնեցրել են TRIPP նախագծի իրականացման հետ կապված գործառնական և իրավական բնույթի մի շարք հարցեր։
Մհեր Գրիգորյանը նաև ներկայացրել է ՀՀ կառավարության «Խաղաղության խաչմերուկ» նախաձեռնությունը՝ շեշտելով տարածաշրջանում բոլոր հաղորդակցությունների ապաշրջափակման անհրաժեշտությունը, դրա ներուժն ու զարգացման հեռանկարները։
Հետևեք մեզ տելեգրամում
