Իրանում մոտ երեք ամիս տևած անջատումից հետո ինտերնետ հասանելիությունը սկսել է վերականգնվել, «BBC»-ի փոխանցմամբ՝ հայտարարել է երկրի առաջին փոխնախագահ Մոհամմադ Ռեզա Արեֆը։
«Դեպի ազատ և կարգավորվող կիբերտարածք հասանելիության ուղղությամբ առաջին քայլն արվել է», – երեքշաբթի X սոցիալական հարթակում գրել է Արեֆը։
Ինտերնետի մոնիթորինգ իրականացնող «Netblocks» և «Kentik» կազմակերպությունները հայտնել են, որ արդեն սկսվել է ինտերնետի «մասնակի» վերականգնումը, թեև «Kentik»-ը զգուշացրել է, որ ցանցերի մեծ մասը դեռևս չի գործում։ «Netblocks»-ը նշել է, որ դեռ պարզ չէ՝ ինտերնետի վերականգնումը շարունակական կլինի, թե ոչ։ Կազմակերպության տվյալներով՝ նախկինում նման անջատումների վերացումից հետո ցանցի ամբողջական վերականգնումը ժամեր է տևել։
«Հասանելիությունը դեռ ամբողջությամբ չի վերադարձել նախկին վիճակին, և կան տարածաշրջանային տարբերություններ», – հայտարարել է «Netblocks»-ի հետազոտությունների տնօրեն Իսիկ Մաթերը։ Նրա խոսքով՝ նկատվում են «ավելի խիստ ֆիլտրումների» նշաններ, քան մինչև հունվարյան անջատումը, որը կիրառվել էր հակակառավարական բողոքների ճնշման ժամանակ։ Այդ թվում՝ ավելացել են սահմանափակումները WhatsApp-ի նման հաղորդագրությունների հավելվածների նկատմամբ։ Նա նաև ընդգծել է, որ Իրանում ինտերնետի վերականգնումը նախկինում ամեն անգամ ուղեկցվել է ավելի խիստ վերահսկողությամբ և սահմանափակումներով։
Հիշեցնենք, որ Իրանի իշխանությունները ինտերնետը անջատել էին փետրվարի 28-ին ԱՄՆ-ի և Իսրայելի հարվածներից հետո։ Պաշտոնյաների խոսքով՝ նպատակը լրտեսությունից և կիբերհարձակումներից պաշտպանվելն էր։ Սա աշխարհում երբևէ արձանագրված ամենաերկար ինտերնետային անջատումներից մեկն է:
Հետևեք մեզ տելեգրամում
