Մեծ Բրիտանիայի մայրաքաղաք Լոնդոնում ծայրահեղ շոգի պատճառով չեղարկվել է «Ծայրահեղ շոգ. կառավարման բարելավում և գործողությունների ուժեղացում ամբողջ աշխարհում» խորագրով միջոցառումը, որը նախատեսված էր անցկացնել Լոնդոնի կլիմայական գործողությունների շաբաթվա շրջանակում։
Միջոցառման կազմակերպիչները հայտնել են, որ համալսարանի շենքը, ինչպես Լոնդոնի շենքերի մեծ մասը, հովացման համակարգերով ապահովված չէ, ուստի հնարավոր չէր երաշխավորել մասնակիցների անվտանգությունը։
Մեծ Բրիտանիայի օդերևութաբանական ծառայությունը Լոնդոնի և Անգլիայի մի շարք շրջանների համար հայտարարել է կարմիր մակարդակի նախազգուշացում՝ ծայրահեղ շոգի պատճառով։ Կանխատեսվում է, որ օդի ջերմաստիճանը կհասնի մինչև 37 աստիճան ըստ Ցելսիուսի։
Շոգի հետևանքով Լոնդոնում և հարավային Անգլիայում հարյուրավոր դպրոցներ փակվել են կամ մասնակի դադարեցրել աշխատանքը։ Տրանսպորտային ծառայությունները ևս զգուշացրել են հնարավոր խափանումների մասին՝ բարձր ջերմաստիճանի ազդեցության պատճառով։
ՄԱԿ-ի գլխավոր քարտուղար Անտոնիու Գուտերեշը, ելույթ ունենալով կլիմայական շաբաթվա մեկ այլ միջոցառման ժամանակ, հայտարարել է. «Լոնդոնը պարզապես չի ահազանգում, այն եփվում է»՝ ընդգծելով, որ աշխարհը բախվում է կլիմայական ճգնաժամի խորացող հետևանքներին։
Հետևեք մեզ տելեգրամում
