Գերմանիայի խորհրդարանը մերժել է «Կանաչներ» կուսակցության խմբակցության նախաձեռնությունը, որով պահանջվում էր ընդլայնել Ուկրաինային տրամադրվող ռազմական ու հումանիտար օգնությունը, ինչպես նաև ապահովել էներգետիկ ենթակառուցվածքների և հիվանդանոցների պաշտպանությունը ռուսական հարվածներից: Նախագիծը մերժվել է 510 դեմ ձայնով, կողմ է քվեարկել միայն 79 պատգամավոր, ձեռնպահ է մնացել մեկը: Այս մասին հայտնում են գերմանական ԶԼՄ-ները:
«Կանաչներ» կուսակցության պատգամավորները կոչ էին անում Գերմանիայի կառավարությանը ընդլայնել Ուկրաինային ցուցաբերվող ֆինանսական, դիվանագիտական, հումանիտար և ռազմական աջակցությունը: Նախագծում հատուկ շեշտադրվում էր հարձակման ենթարկված էներգետիկ ենթակառուցվածքների, հիվանդանոցների և տրանսպորտային ուղիների վերականգնման, արդիականացման ու ապակենտրոնացման անհրաժեշտությունը։
Բացի այդ, բանաձևի հեղինակները կառավարությունից պահանջում էին.
- Խթանել ուկրաինական ԱԹՍ-ների և հեռահար կարողությունների արտադրությունը,
- Անհապաղ Գերմանիայում պատվիրել Ուկրաինայի համար անհրաժեշտ «Patriot» համակարգերի հակահրթիռների (PAC-2) լրացուցիչ արտադրություն,
- Ընդլայնել ուկրաինական ուժերի հնարավորությունները՝ Ռուսաստանի տարածքի խորքում գտնվող հրամանատարական կետերը, հրթիռների արձակման կայանները, ռազմական օդանավակայանները, զինամթերքի ու վառելիքի պահեստները, ինչպես նաև ռազմարդյունաբերական ձեռնարկությունները ոչնչացնելու համար։
Նախագծի հեղինակները մատնանշել են, որ նախորդ տարվա ընթացքում Ռուսաստանը շուրջ 56,700 օդային հարված է հասցրել Ուկրաինայի քաղաքացիական թիրախներին, իսկ վերջին շաբաթներին հարձակումները կենտրոնացել են ուկրաինական քաղաքների բնակելի թաղամասերի վրա:
Պատգամավորները նաև ընդգծել են, որ չնայած Ուկրաինան հունիսի սկզբին պատրաստակամություն էր հայտնել անհապաղ հրադադարի և խաղաղության բանակցություններ սկսելու, Ռուսաստանն ի պատասխան հայտարարել է պատերազմը շարունակելու մտադրության մասին։
Հետևեք մեզ տելեգրամում
