ԱՄՆ զինված ուժերը 13-րդ գիշերն անընդմեջ հարվածներ են հասցրել Իրանին։ «Al Jazeera»-ն, հղում անելով իրանական պետական լրատվամիջոցներին, հայտնել է, որ հարձակումների հետևանքով զոհվել է առնվազն չորս մարդ։
ԱՄՆ Կենտրոնական հրամանատարությունը հայտարարել է, որ թիրախավորվել են Իրանի ռազմական հրամանատարական կենտրոնները, անօդաչու թռչող սարքերի պահեստները, կապի ցանցերը, առափնյա վերահսկողության օբյեկտներն ու ծովային ռազմական ենթակառուցվածքները։ Ըստ հրամանատարության՝ գործողությունների նպատակն էր նվազեցնել Իսլամական հեղափոխության պահապանների կորպուսի (ԻՀՊԿ) սպառնալիքը միջազգային առևտրային նավագնացության համար։
Իրանի Խուզեստան նահանգի փոխնահանգապետ Վալիոլլահ Հայաթին հայտնել է, որ Ահվազ քաղաքի մերձակայքում ամերիկյան հրթիռային հարվածների հետևանքով զոհվել է չորս մարդ, ևս հինգը՝ վիրավորվել։ Պայթյուններ են արձանագրվել նաև երկրի ևս վեց նահանգներում, այդ թվում՝ Լորեստանում և Հորմոզգանում։
Միաժամանակ հրամանատարությունը հայտարարել է, որ Հորմուզի նեղուցը շարունակում է բաց մնալ նավագնացության համար, և առևտրային նավերը ԱՄՆ ռազմածովային ուժերի աջակցությամբ շարունակում են անվտանգ անցնել այդ երթուղով։ Իրանը, սակայն, պնդում է, որ վերահսկում է նեղուցը, և անվտանգ անցումը հնարավոր է միայն Թեհրանի հետ համակարգման դեպքում։
Իրանի զինված ուժերը հայտարարել են, որ ի պատասխան ամերիկյան հարվածների՝ նոր անօդաչու թռչող սարքերով հարվածներ են հասցրել Բահրեյնում և Հորդանանում տեղակայված ամերիկյան ռազմական օբյեկտներին։ «Մեհր» գործակալության փոխանցմամբ՝ Բահրեյնի Շեյխ Իսա ավիաբազայում թիրախավորվել են վառելիքի պահեստներ, սարքավորումների պահեստներ և զինծառայողների կացարաններ, իսկ Հորդանանի Մուվաֆաք Սալթի (Ալ-Ազրաք) ավիաբազայում՝ ինքնաթիռների անգարներ, տեխնիկական սպասարկման տարածքներ և անձնակազմի կեցավայրեր։
Հետևեք մեզ տելեգրամում
