Վրաստանի վարչապետ. «Օտարերկրյա գործակալները» սպառնում են երկրի ազգային ինքնությանը

Վրաստանի վարչապետ Իրակլի Կոբախիձեն կրկին հայտարարել է, որ «օտարերկրյա գործակալները» փորձում են խաթարել Վրաստանի ազգային ինքնությունը: Փոխանցում է «News Georgia»-ն։

«Օտարերկրյա գործակալության նպատակն ազգային ինքնության խաթարումն է։ Մենք պետք է հակազդենք այս ամենին, սակայն բացառապես օրենքի շրջանակում, այդ թվում՝ օրենսդրությունը կատարելագործելու միջոցով»,- հայտարարել է Կոբախիձեն։

Վարչապետը չի մանրամասնել, թե ինչ նոր օրենսդրական փոփոխություններ կարող են սպասվել։

Նշենք, որ անցած շաբաթ Վրաստանում իշխող կուսակցությանը աջակցող հասարակական երկու շարժում է ստեղծվել։ Նրանց ներկայացմամբ՝ կազմակերպությունները զբաղվելու են ազգային ավանդույթների, եկեղեցու և ազգային ինքնության պաշտպանության հարցերով։

Հավելենք, որ Վրաստանի իշխող կուսակցությունը «օտարերկրյա գործակալներ» է անվանում իր առավել ակտիվ քննադատներին՝ ընդդիմության մի մասին, ինչպես նաև հասարակական կազմակերպություններին ու շարժումներին, որոնք տարիներ շարունակ ֆինանսավորում են ստացել արևմտյան երկրներից։ 2024 թվականին Վրաստանում ընդունվել է նաև «օտարերկրյա ազդեցության թափանցիկության մասին» օրենքը, որը պարտավորեցնում է արտերկրից իրենց ֆինանսավորման ավելի քան 20 տոկոսը ստացող կազմակերպություններին գրանցվել որպես «օտարերկրյա տերության շահեր ապահովող կազմակերպություն» և ներկայացնել ֆինանսական հայտարարագրեր։ Օրենքը քննադատության է արժանացել ընդդիմության և հասարակական կազմակերպությունների կողմից, որոնք պնդում են, որ այն սահմանափակում է քաղաքացիական հասարակության գործունեությունը։