Լիբանանն ու Իսրայելը երեքշաբթի Հռոմում սկսել են ԱՄՆ-ի միջնորդությամբ անցկացվող բանակցությունների նոր փուլը։ Կողմերը քննարկել են հունիսին ձեռք բերված շրջանակային համաձայնության իրականացումը, որը նախատեսում է Լիբանանի հարավից Իսրայելի զորքերի փուլային դուրսբերում, Հեզբոլլահի զինաթափում և այդ տարածքներում լիբանանյան բանակի տեղակայում։
Ըստ «The National»-ի` բանակցություններում Բեյրութի հիմնական պահանջներից մեկն Իսրայելի կողմից հարավային Լիբանանում իրականացվող գործողությունների դադարեցումն է, որոնք, ըստ լիբանանյան կողմի, խոչընդոտում են համաձայնագրի իրականացմանը։ Լիբանանը նաև ցանկանում է ընդլայնել այսպես կոչված «փորձնական գոտիների» ծրագիրը, որի շրջանակում Իսրայելի ուժերը պետք է հեռանան որոշ տարածքներից, իսկ վերահսկողությունը փոխանցվի լիբանանյան բանակին։
Նշենք, որ առաջին նման գոտին ստեղծվել է Զավթար ալ-Ղարբիյա գյուղում, որտեղ Իսրայելի զորքերի դուրսբերումից հետո տեղակայվել է լիբանանյան բանակը։ Այժմ քննարկվում է նոր գոտիների ստեղծման հնարավորությունը, այդ թվում՝ Բինթ Ջբեյլ և Խիամ քաղաքներում։
Միաժամանակ, «ArabNews»-ի փոխանցմամբ՝ Իսրայելը հայտարարել է, որ դեմ է «փորձնական գոտիների» ընդլայնմանը, ինչպես նաև չի ցանկանում, որ այդ մեխանիզմում ներգրավվի Ֆրանսիան։ Ըստ իսրայելական լրատվամիջոցների՝ Իսրայելը մտահոգված է իր անվտանգությամբ և պնդում է, որ «Հեզբոլլահը» նախ պետք է զինաթափվի, և միայն դրանից հետո հնարավոր կլինեն հետագա քայլերը։
Ինչպես հաղորդել էինք ավելի վաղ, Հեզբոլլահի առաջնորդ Նաիմ Քասեմը քննադատել է Լիբանանի և Իսրայելի միջև ուղիղ բանակցությունները՝ դրանք անվանելով «ամոթ և նվաստացում Լիբանանի համար»։ Նա նաև մեղադրել է Լիբանանի նախագահ Ջոզեֆ Աունին՝ պնդելով, որ նա չի գործում որպես չեզոք և միավորող գործիչ։
Հետևեք մեզ տելեգրամում
