Գազայի հատվածի բնակչության մեծ մասը ջրին և սանիտարահիգիենիկ պայմաններին բավարար հասանելիություն չունի: Այս մասին ահազանգել է ՄԱԿ-ի Մարդասիրական հարցերի համակարգման գրասենյակը (OCHA), փոխանցում է Al-Jazeera-ն:
Ըստ գրասենյակի զեկույցի՝ Գազայի ավելի քան 1,3 միլիոն բնակիչ, որը կազմում է տարածքի բնակչության ավելի քան կեսը, օրական մեկ անձի հաշվով ստանում է 6 լիտրից պակաս ջուր՝ խմելու և սնունդ պատրաստելու համար։ Մինչդեռ միջազգային չափանիշներով՝ արտակարգ իրավիճակներում մեկ անձին օրական անհրաժեշտ է նվազագույնը 15 լիտր ջուր՝ խմելու և կենցաղային օգտագործման համար։
Եվս 700,000 մարդ՝ բնակչության ավելի քան մեկ երրորդը, ստանում է օրական 9 լիտրից պակաս ջուր։ OCHA-ն ընդգծում է, որ սա էապես վտանգում է հիգիենան պահպանելու և երեխաների նվազագույն կարիքները հոգալու հնարավորությունը։
«Ջրի բաշխման կետերում գերբեռնված իրավիճակ է: Մարդիկ հաճախ չունեն բավարար քանակությամբ տարաներ՝ ջուրը տուն տեղափոխելու համար։ Այս ծանր առաջադրանքը հաճախ մնում է երեխաների ուսերին», – նշել է ՄԱԿ-ի գործակալությունը։
Ըստ կառույցի՝ անվտանգ ջրի բացակայությունն ու սանիտարական ճգնաժամը խորանում են ամեն օր։ Իրավիճակը բարդանում է նաև նրանով, որ տնային տնտեսությունների միայն կեսն ունի հիմնական սանիտարական կամ առանձնացված հարմարություններից օգտվելու հնարավորություն, իսկ ավելի քան 900,000 մարդ ստիպված է ապրել բնակելի տարածքներում կուտակված աղբի անմիջական հարևանությամբ։
Հետևեք մեզ տելեգրամում
