Տարածաշրջանային վերջին զարգացումները, հատկապես` Իրանի դեմ ԱՄՆ-ի և Իսրայելի 40-օրյա պատերազմը, էապես մեծացրել են Կասպից ծովի ռազմավարական նշանակությունը։ Այս մասին Կասպից ծովի օրվան նվիրված միջոցառման շրջանակներում հայտարարել է Իրանի արտաքին գործերի փոխնախարար Քազեմ Ղարիբաբադին: Փոխանցում է իրանական ISNA լրատվական գործակալությունը:
Դիվանագետի խոսքով՝ ափամերձ երկրներն ամենաշատն են ենթարկվում ավազանում տեղի ունեցող իրադարձությունների ազդեցությանը, հետևաբար հենց իրենք էլ պետք է կրեն հիմնական պատասխանատվությունը տարածաշրջանի անվտանգության, կայունության և ապագայի համար։
Անդրադառնալով Կասպից ծովի իրավական կարգավիճակի մասին կոնվենցիային՝ Ղարիբաբադին ընդգծել է, որ առափնյա պետությունները պետք է բացառեն արտաքին ներկայությունը.
«Կասպից ծովի անվտանգությունը չպետք է վերածվի տարածաշրջանից դուրս գտնվող տերությունների մրցակցության կամ ներկայության ասպարեզի։ Ափամերձ երկրներն ինքնուրույն ի վիճակի են և պետք է կարողանան երկխոսել ու որոշումներ կայացնել։ Կասպից ծովը կարող է և պետք է լինի տարածաշրջանային անվտանգության համակարգի օրինակ, որը ձևավորվում է տարածաշրջանի երկրների կողմից և տարածաշրջանի երկրների համար», – հայտարարել է Իրանի ԱԳ փոխնախարարը։
Նա նկատել է, որ հինգ ափամերձ երկրների միջև տեսակետների և ազգային առաջնահերթությունների տարբերությունը բնական երևույթ է, սակայն, ըստ նրա, Կասպից ծովը շարունակում է մնալ այն հարթակը, որը պահպանում է երկխոսության, վստահության ամրապնդման և համագործակցության մեծ ներուժը։
Ելույթի ընթացքում Իրանի փոխնախարարն անդրադարձել է նաև անվտանգային կոնկրետ սպառնալիքներին՝ հիշատակելով ԱՄՆ-ի և Իսրայելի կողմից Կասպից ծովում իրանական ենթակառուցվածքների թիրախավորման, ինչպես նաև Ուկրաինայի կողմից իրանական նավի հրթիռակոծման դեպքերը։ Ղարիբաբադին շեշտել է, որ Կասպից ավազանի բոլոր առափնյա երկրները պետք է միասնական դիրքորոշում հայտնեն և դատապարտեն նմանօրինակ գործողությունները։
Հետևեք մեզ տելեգրամում
