Թուրքիան տարբեր, այդ թվում՝ ռազմական գործողությունների ծրագրեր է մշակել, եթե Սիրիայի հյուսիսում գտնվող քրդական ուժերը հրաժարվեն զինաթափվել, հայտնում է «Հյուրիեթ» թերթը։
Պարբերականը նշում է, որ «Սիրիայի դեմոկրատական ուժեր» (SDF) քրդական կոալիցիայի առաջնորդ Մազլում Աբդին, որը Անկարան համարում է արգելված Քրդստանի աշխատավորական կուսակցության (PKK) ճյուղ, չի կատարում Արաբական Հանրապետության ժամանակավոր նախագահ Ահմեդ ալ-Շարաայի հետ մարտին ստորագրված համաձայնագրի պայմանները։ Ըստ ծրագրի՝ քուրդ մարտիկները պետք է ներառվեն անցումային կառավարության զինված ուժերում։
«Սիրիայում անկայունության պայմաններում SDF ուժերը՝ PKK-ի և YPG-ի (Ժողովրդական ինքնապաշտպանական ջոկատներ) հետ միասին, չեն հանձնի իրենց զենքերը: Թուրքիան ունի գործողությունների ծրագրեր տարբեր ռիսկերի համար: Այն թույլ չի տա Սիրիայի մասնատումը և տարածաշրջանի (հյուսիսում) անցումը SDF/PKK/YPG-ի վերահսկողությանը»,-նշում է թերթը՝ ընդգծելով, որ այն պայմաններում, երբ Իսրայելը փորձում է ապակայունացնել Սիրիան, Թուրքիան կողմ է նրա տարածքային միասնականության և կայունության ապահովմանը։
«Թուրքիան համագործակցում է ԱՄՆ-ի հետ քրդական ուժերի զինաթափման և Դամասկոսի նոր վարչակազմի համակարգում նրանց ինտեգրման հարցում՝ վարելով «ռազմավարական համբերության» քաղաքականություն: Եթե սա արդյունք չտա, և SDF/PKK/YPG-ն չհետևի զինաթափման ուղուն, կկիրառվի ռազմական տարբերակը»,-գրում է թերթը։
Հետևեք մեզ տելեգրամում
