ՀՀ-ում ԱՄՆ դեսպան Քրիստինա Քվինը Հայաստանում Ամերիկայի առևտրի պալատում հանդես է եկել ԱՄՆ քաղաքականության առաջնահերթությունների և գործարար համայնքի հետ գործակցության նոր հնարավորությունների մասին ելույթով։ Իր խոսքում դեսպանը նշել է, որ 2025 թ․ ընթացքում հայ-ամերիկյան հարաբերություններում պատմական առաջընթաց է արձանագրվել, և հարաբերությունները այսօր ավելի ամուր են, քան երբևէ։ Նրա գնահատմամբ՝ տարին նշանավորվել է Հայաստանի ու ԱՄՆ-ի միջև ռազմավարական գործընկերության մեկնարկով, որը զգալիորեն ամրապնդել է քաղաքական, տնտեսական և անվտանգության ոլորտների համագործակցությունը։
Դեսպան Քվինը ընդգծել է, որ օգոստոսի 8-ի գագաթնաժողովը, որտեղ նախագահ Թրամփը հյուրընկալել է վարչապետ Փաշինյանին և նախագահ Ալիևին, դարձել է տարածաշրջանային խաղաղության գործընթացի բեկումնային փուլ։ Գագաթնաժողովում Հայաստանն ու Ադրբեջանը նախաստորագրել են խաղաղության համաձայնագրի նախապես համադրված տեքստը, իսկ ստորագրված համատեղ հռչակագիրը վերահաստատել է միջազգային սահմանների անխախտելիության և ուժի կիրառման անթույլատրելիության սկզբունքը՝ համաձայն Ալմա-Աթայի հռչակագրի։ Դեսպանի խոսքով՝ այս հանձնառությունը նվազեցրել է անվտանգության հետ կապված մտահոգությունները և ստեղծել է առավել վստահելի ներդրումային միջավայր։
Քվինը նշել է, որ «Թրամփի ուղի հանուն միջազգային բարգավաճման և խաղաղության» նախաձեռնությունը բացել է Հայաստանի համար նոր հնարավորություններ՝ ընդլայնելու առևտրային ուղիները և վերաինտեգրվելու գլոբալ շուկաներին։ Նախաձեռնության շնորհիվ Հայաստանը ստացել է առավել նպաստավոր պայմաններով գործընկերներ ընտրելու հնարավորություն, ինչը, ըստ դեսպանի, ուժեղացրել է երկրի բանակցային դիրքերը ներմուծման, արտահանման և համատեղ ծրագրերի ոլորտում։
Դեսպանը հիշատակել է նաև օգոստոսի 8-ին ստորագրված երեք փոխըմբռնման հուշագրերը՝ ընդգծելով, որ դրանց իրականացումն արդեն սկսվել է։ Էներգետիկ անվտանգության հարցով հուշագիրը ձևավորել է երկկողմ համագործակցության նոր հարթակ, իսկ «123 համաձայնագրի» շուրջ ընթացող բանակցությունները Հայաստան են բերել քաղաքացիական միջուկային տեխնոլոգիաների անվտանգ կիրառման հեռանկարները։
Կիսահաղորդիչների և արհեստական բանականության ոլորտում համագործակցությունը ևս առաջընթաց է գրանցել․ Firebird ամերիկյան ընկերությունը ստացել է անհրաժեշտ արտահանման լիցենզիա և հայտարարել է 500 մլն ԱՄՆ դոլարի ներդրման մասին՝ համագործակցելով Dell և NVIDIA ընկերությունների հետ։ Սրանով ըստ Քվինի, Հայաստանը ուժեղացել է որպես տարածաշրջանային բարձր տեխնոլոգիաների կենտրոն։
Երրորդ հուշագիրը, որը վերաբերում է սահմանների անվտանգության և տրանսպորտային ենթակառուցվածքների բարելավմանը, նույնպես արդեն մտել է գործնական փուլ։ ԱՄՆ Մաքսային և սահմանային պահպանության ծառայության փորձագետները կատարել են նախնական գնահատում, իսկ 145 մլն ԱՄՆ դոլարի նոր ֆինանսավորումը ուղղվել է «Թրամփի ուղու» զարգացմանը և սահմանային կառավարման արդիականացմանը։
Ամփոփելով իր խոսքը՝ դեսպան Քվինը նշել է, որ 2025-ը դարձել է շրջադարձային տարի հայ-ամերիկյան հարաբերությունների համար, և ներկայումս բացված հնարավորությունները գործարար համայնքը պետք է օգտագործի առանց ուշացման։ Նա կրկին հաստատել է ԱՄՆ պատրաստակամությունը սերտորեն աշխատելու Հայաստանի բիզնես շրջանակների հետ՝ 2026 թվականը դարձնելու համար ավելի արդյունավետ և համագործակցային։
Հետևեք մեզ տելեգրամում
