ԱՄՆ առաջին տիկին Մելանյա Թրամփը Սպիտակ տանը հյուրընկալել է «Կերտենք ապագան միասին» գլոբալ գագաթնաժողովը, որը նպատակաուղղված է կրթական միջոցների հասանելիության ընդլայնմանը և թվային տիրույթում երեխաների անվտանգության ապահովմանը:
Միջոցառմանը Թրամփը ներկայացել է ամերիկյան արտադրության Figure 3 մարդանման ռոբոտի հետ։ Ռոբոտը 11 լեզվով ողջունել է ավելի քան 40 երկրներից ժամանած հյուրերին, այդ թվում՝ Ֆրանսիայի առաջին տիկին Բրիջիտ Մակրոնին:
Մելանյա Թրամփն ընդգծել է, որ արհեստական բանականությամբ օժտված համակարգերը շուտով կդառնան առօրյա կյանքի անբաժանելի մասը: Նա ներկայացրել է «Պլատոն» անունով մարդանման կրթական համակարգի տեսլականը, որը կարող է հարմարվել յուրաքանչյուր երեխայի ուսուցման տեմպին ու հուզական կարիքներին՝ միաժամանակ զարգացնելով նրանց քննադատական մտածողությունը:
ԱՄՆ առաջին տիկինը շեշտել է, որ տեխնոլոգիական նորարարությունը ԱՄՆ տնտեսական առաջնորդության գրավականն է։ Սակայն միաժամանակ կոչ է արել առաջնահերթություն համարել երեխաների անվտանգությունը AI տեխնոլոգիաների ներդրման գործընթացում:
Հետևեք մեզ տելեգրամում
