Հայաստանի կառավարության կողմից առաջ քաշված «Խաղաղության խաչմերուկ» հայեցակարգը ոչ միայն հետաքրքիր գաղափար է, այլև տարածաշրջանը միջազգային լոգիստիկ հաբի վերածելու իրական հնարավորություն, սակայն դրա լիարժեք իրագործման համար անհրաժեշտ է հաղթահարել մի շարք պատնեշներ, այդ թվում՝ աշխարհաքաղաքական։ Նման կարծիք է հայտնել Հայաստանում Իրանի Իսլամական Հանրապետության դեսպան Խալիլ Շիրղոլամին՝ ելույթ ունենալով «Տարածաշրջանային զարգացումները և «Խաղաղության խաչմերուկ» նախագծի հեռանկարները» խորագրով քննարկմանը։
Ըստ Շիրղոլամիի՝ նախագծի հաջողության գլխավոր նախապայմանը «տարանցիկ նոր մշակույթի» ձևավորումն է, որը հիմնված կլինի ոչ թե մրցակցության ու մեկը մյուսին շրջանցելու, այլ փոխլրացման և ներառականության սկզբունքների վրա։ Նա մտահոգություն է հայտնել, որ տարածաշրջանում դեռևս գերակշռում է բացառման հոգեբանությունը, երբ երկրները վախենում են շրջանցվելուց, ինչը խոչընդոտում է «win-win» (երկուստեք շահավետ) տարբերակների ստեղծմանը։ Որպես գործնական բացթողում՝ բանախոսը նշել է Հայաստանում լոգիստիկ կարողությունների և մասնագիտացված ընկերությունների պակասը, ինչը թույլ չի տվել լիարժեք օգտագործել իրանական բեռների տեղափոխման հնարավորությունը վերջին ճգնաժամային իրավիճակներում։
Անդրադառնալով տեխնիկական մարտահրավերներին՝ Շիրղոլամին նշել է, որ դրանք իրականում ամենահեշտ լուծելի խնդիրներն են, քանի որ տարածաշրջանում անհրաժեշտ ենթակառուցվածքների, այդ թվում՝ երկաթուղիների շուրջ 90-95%-ն արդեն իսկ առկա է։ Նրա համոզմամբ՝ «Հյուսիս-Հարավ», «Պարսից ծոց – Սև ծով» և «Միջին միջանցք» նախագծերը չպետք է դիտարկվեն որպես իրարամերժ միավորներ, այլ պետք է ծառայեն ընդհանուր կապվածության ամրապնդմանը։ Եզրափակելով խոսքը՝ բանախոսը վերահաստատել է, որ եթե երկրները ցուցաբերեն քաղաքական կամք և հրաժարվեն բացասական աշխարհաքաղաքական մրցակցությունից, Հարավային Կովկասը կարող է դառնալ միջազգային կարևորագույն տարանցիկ հանգույց, ինչը տնտեսական մեծ օգուտներ կբերի տարածաշրջանի բոլոր պետություններին։
Հետևեք մեզ տելեգրամում
